(首先的首先: 說普通話的朋友, 請去我的中文網頁. English Speaker please visit here.) 講廣東話的朋友, 你地留低吧! 因為我呢篇係用廣東話打的! 前言: 睇完呢幾張滑雪高手0既相. 係咪覺得好型呢? 好想好似佢地咁呀呵? 係咪即刻好有衝動想去雪山玩番轉呢? 的確, 滑雪係一種令人欲罷不能0既運動... 豹豹自2011年開始滑雪之後, 就深深咁俾呢樣運動吸引住啦... 每年總要去一兩次先至安樂... 每年滑最小 3 個星期, 最多 1 到 2個月. 先作一點自我介紹: 豹豹是一個喜歡滑雪, 更熱愛所有0既After ski 活動. 我係一個 Ski 同 Snowboard 都玩0既兩棲. 唔敢講話好叻, 但唔計體力, 我自問一定唔算差果堆... 心願係以後每年十二月開始就可以長駐一個有雪滑0既雪場. 直到雪季完結之後就玩一排水上活動直到第二年雪季開始... (唔, 自從哈爾濱室內滑雪場開左, 我都變成四份之一個東北人咁滯. 黎繄 2019年廣州室內滑雪場開左之後, 我都應該會長駐果度架啦! 所以我而家2018年更新之後0既心願係: 1年365日, 日日都有雪滑!) 如果你有興趣睇哈爾濱室內滑雪場的資料, 中文版按這裡, English Version Click Here! 近年愈來愈多香港人喜歡上滑雪呢樣運動, 見到愈黎愈多志同道0既朋友, 其實係一件好開心0既事. 但同時亦都發現一個好大0既問題, 就係好多人成日第一次滑雪整到之後, 然後... 就再無然後啦. 然後就番黎同所有人講滑雪好危險. 的確, 滑雪絶對一定屬於高危活動. 但同時亦都有好多人去到七老八十都係度玩. 真0既, (豹豹今年係法國見到成批老伯伯好型咁玩Snowboard, 個個平均年齡70+) 如果你下下玩到 110KM咁衝落山, 好易整到, 但講真, 以大部份香港人玩家, 8成以上都係BB班至中級程度), 跌到或者撞到0既意外好難會整到好傷. 好大部份都係自己唔識得保護自己. 所以今日特登寫一篇滑雪初哥必讀. 第一件: 要帶護具! 滑雪很危險, 所以要帶護具 滑雪很危險, 所以要帶護具 滑雪很危險, 所以要帶護具 因為好重要, 所以要重覆三次. 無論你有沒有滑雪經驗, 我都希望你會帶護具... 好多時都見到好多香港人係雪山都有一個特點: 著0的衫好靚, 但好多都其實由山頂仆到落山腳. 我明白... 正所謂, 唔打得都睇得! 同埋... 帶護具好煩, 好多野著... 帶護具好醜樣, 個頭盔好大好笨重, 冷帽型好多; 著Pat褲影到我好大個Pat Pat, 唔夠靚. 人地日本人, 外國人唔帶啦, 我帶好似好白痴... 但實情係... 人地外國人0既抗打力強過我地好多... 三四米跌落黎、一野撻落條鉄度都係笑兩下起番身... 而我地跌一下已經講緊要去醫院驗傷... 另外, 講真... 初學0既, 你好大機會成日跌, 唔帶護具跌多幾次就會怕. 叻0既, 你唔好話我知你成日都滑得好慢呀!? 快起上黎, 一跌低就好易整親. (Snowboard 快起上黎都50 - 60 KM/ Hour啦, Ski 仲快, 80-90 KM/Hour 呀!) 再叻0的, 要玩花式0既, 更加要帶, 我咁耐都未見過一個玩花式可以唔跌倒0既人. 更退一步來說, 因為滑雪場係一個有很多危險品的地方, 其實你企係度都可以整親. 豹豹自開始滑雪以來, 真正因為滑雪而受傷的次數屈指可數. 而且大部份都集中在初學時期. 但在滑雪場發生的血案卻差不多一年一次. 仲係"鑊鑊新鮮鑊鑊甘" 第一次血案... 話說當時我同班朋友一齊由酒店行去滑雪場時, 果條係一條好窄的窄路, 只能夠俾一個人經過的小路, 豹豹因為著 Snowboarding 鞋, 行得快過班 Ski 0既雪友倍零兩倍咁多啦, 就行左係成班人0既最前面. 話說前面有條媽媽帶住個三四歲0既BB, 一個人拎住二對ski, 應該行行下覺得太辛苦就休息下, 當我差唔多走到佢後面0既時候, 佢突然望都無望後面就抬起佢果兩對ski, 放上肩頭! 走係佢後面0既我, 就俾佢一抬一放0既ski尾一下神龍擺尾打左落去我個頭度啦啦! 好在我有滑雪四寶之一0既頭盔! 佢對ski 一下就打左落去我個頭盔度, 留低左一個白印, 如果我無帶頭盔, 應該爆晒血! 當場昏迷都有份! 太太當然驚到震, 如果我有事佢都唔知點算. 呢件事之後我發現: 頭盔好重要! 响雪場度做任何動作之前都要望一望前後左右, 肯定無人先好做一0的會有危險性0既野! 滑雪同開車一樣, 有好多意發生時其實都唔係你錯... 而係人地撞埋黎/ 剷埋黎/車埋黎... 第二次血案... 呢次仲慘, 發生果陣時, 我連雪場都未去到... 話說我同朋友去富良野. 諗住為左易0的預時就決定搭JR入去, 點不知... 去到富良野車站先發覺... 個車站好細, 細到連升降機都無... 無計啦, 惟有自己搬0的野上橋再落橋咁去第二個月台0既出口啦... 搬完個行李上去之後, 可能阿員工伯伯見我地兩個女仔咁辛苦, 就落我地手拎左我個Snowboarding Bag上去, 點不知佢又係無留意, 係樓梯頂一轉身, 一個神龍擺尾!! 就將我個行李掃左落黎! 我就好似一個保齡球樽咁俾個行李掃低左, 好在我危急關頭用手頂一頂, 掃一掃開佢, 唔係個膝頭應該骨都碎. 但即使已經撞得無咁應, 我膝頭都瘀晒. 第三次血案... 今次好0的啦... 發生係我地滑完晒雪之後, 諗住走啦.. 雖然未離開個雪場, 但已經除左一隻腳 Binding 出黎, 除埋個護腕, 純粹諗住約埋0的朋友等陣沖完涼之後去邊度飲野, 就講多兩句... 但因為果日由朝早八點玩到下午四點, 個人已經謝晒, 隻腳一無力就向後跌, 後腦狠狠咁撞埋個地上面, 好在有個頭盔, 唔係後腦開花... 但隻手撐一撐, 痛左三個星期都未好. 其實仲有好多... 試過俾0的初學者撞埋黎... 試過因為避人地而剷左埋0的樹度... 剛剛開始學時落Chairlift 時滑一滑係個後腦撞左落地... 下刪一千字... 總而言之... 無論何時何刻, 你係初學又好, Pro又好, 只要你一打算滑雪, 請你係儘可能0既情況下都帶上護具... 整親要使錢睇醫生不特止, 又痛又無得玩事大... 帶左護具, 起碼減少左 8 成以上0既受傷機會. 好啦, 講左咁耐要帶護具, 要帶乜野護具先啱呢? 玩 Ski 的請最小要帶 Knee Support (護膝)、頭盔. 玩Snowboard 的最小要帶Knee Pad 護膝、護Pat、護腕和頭盔. 護膝 先講下玩 Ski (雙板滑雪) 的 Knee Support(護膝), 雖然在中文內我地成日都將 Skier 著0既 knee support 同 Snowboarder 著0既 knee pad 都叫做護膝, 但甚實兩者完全係唔同0既野黎!!! Skier 著0既護膝 (Knee Support) 主要用於減低滑雪時對膝蓋做成的壓力、增強膝蓋的承受能力, 防摔的保護性無 Snowboarding Knee Pad 咁強. 點解要著 Knee Support 呢? 首先, 我建議每一個 Skier 都應該用 Knee Support, 特別是平常無乜點運動開0既朋友. Skiing 其實係一項對你0既大腿肌肉要求很高0既運動. 你0既大脾需要好強, 唔係你0既膝頭就會承受好大0既壓力. 所以穿了一個高質數的 Knee Support 就能夠好有效咁保護好你的膝頭. 如果我本身就係一個成日運動, 有著"強勁的大脾"的人呢? 答案是: "都要著!!" 係, 我知道你有強健偉岸的體魄, 但同樣, 首先你係一個人, 人會有疲累0既時候. 人會有狀態唔好0既時候. 你狀態唔好時, 你D肌肉就無咁有力啦, 同樣, 所有的壓力都會湧晒去你個膝頭度去了. 所以, 你強, 你叻, 但都要用Knee Support! 咁我應該揀邊種護膝呢? 簡單D講, 膝頭比較弱或是曾經受過傷的朋友就選一個最強的, 護膝入面有條金屬條果種, 無受過傷的就用次一級的, 以下是兩個豹豹和雪友們滑 Ski 時都會用的 Knee Support: Ski 護膝推介 (Recommended Skier Knee Support) 其實唔可以話推介, 因為我只係話俾你知我用緊/ 用過0既幾款... 哈哈哈... 如果大家想知詳細滑雪護具攻略我可以另外寫一篇... 受過傷的朋友用的是這個: Shock Doctor 的 有金屬條支撐的 Knee Support 沒受過傷的我自己用的是這個: Shock Doctor 的普通版 Knee Support 點解揀 Shock Doctor 呢? 因為呢個係一個跌打中醫朋友推介0既! 雖然貴左D, (一隻貴過人地淘寶買一對) 但我自從著左呢個護膝後, 到而家個膝頭都無受過乜野傷, 即使有一次我係一片大冰面上跌左鑊狠狠的, 都無事! 以前豹豹試過用平 D 的護膝, 雖然睇起黎差唔多, 但係跌到時真係會受傷的, 大大小小拉傷扯傷實有. 而且呢個護膝係我响美國 Amazon 訂, 平過香港好多. 我果陣時一次過訂左頭盔, knee support, ski poles. 運左去轉運公司, 然後一次過寄番黎, 運費計番埋先百幾蚊. 好抵. Snowboard 護膝推介 (Recommended Snowboarding Knee Pad) 至於玩Snowboard的朋友, 你地要買的就係 Knee Pad 啦, 主要係保護你0既膝頭. 免得跌跌撞撞時受傷... 豹豹試過好多 knee pad... 經歷過幾次好慘痛的教訓後, 而家豹豹都係用呢隻: POC Joint Knee Pad. 揀呢隻 Knee Pad 因為見到我個朋友著住佢成個膝頭撞左埋舊石頭度都無事, 所以我都揀佢, 著左之後, touch wood 又真係無乜受過傷啦! 跌倒時真係好似無乜感覺咁! 豹豹貼心小提示: Knee Pad 真係要買隻好D架... 我就係有一次唔記得拎對好0既, 求其攞左對淘寶貨... (又諗住應該無咁好彩的)結果... 血案四號 就出現啦... 話說我係個冰面一剷一仆, 膝頭撞落去時差唔多等於裸撞咁滯, 果下又撞正滑得有番咁上下快, 我本身又有番咁上下斤兩重... 結果... 我膝頭就腫左二個幾三個星期啦, 攪到要去針灸放血, 醫左二個月. 所以... 你明點解我咁強調護具啦!! 頭盔 滑雪一定要載頭盔, 大家一定要記住 "又要威, 又要載頭盔" 呢句形容詞, 係滑雪作面係絶對正面架! 直譯0既意思係: "你想滑雪要威, 首先一定要載頭盔!" 因為載左頭盔 - 起碼你0既安全有保証. 閒話: 豹豹最憎果 D 自己滑得叻就成日同人講我都係鐘意唔載頭盔0既人/ 教練. 你唔重視你自己條命就算啦! 仲係咁推廣唔載頭盔呢個觀念, 有人聽左你咁講之覺得"唔載頭盔型呀, 我都唔載先!" 跟住真係有意外時, 你於心何安呀!? 你安全勒, 就長滑長有啦係咪? 以前係歐美D人唔慣載頭盔, 而家愈黎愈多人載頭盔. 由1:9, 唔載頭盔9, 到而家7:3, 7 成人載頭盔, 得番小小唔盔. 我知, 載頭盔好似無咁靚. 我明, 載頭盔好似好大舊. 我了解, 頭盔好阻行李位, 攪到買小左野. 但你要明白, 一有意外的話, 你個頭盔會救你一命. 從呢段片你會睇到一個頭盔有幾重要... 滑雪頭盔推介 (Snowboarding Helmet Recommendation) 豹豹自己就用緊呢個: Anon Men's Rodan Helmet 揀佢個原因因為我個頭大! 係亞洲區無乜選擇, 但買頭盔又一定要試, 結果有次我係日本試左呢個, 好0岩我頭型, 而 Amazon US 又可以有橙色俾我揀, 所以我先揀佢, 但假如你個頭唔似我咁大, 你可以根據呢幾個原因黎講: 輕身, 舒服, 形狀, 仲有仲有... 夠唔夠靚呀!? 題外話: 建議大家買野時先去歐美D網站睇下先, 始終果度款多價平... 如果你地有野想買可以話我知, 因為我有個朋友好多時都有 Discount... 雖然唔多, 但2, 3 個子都夠飲番杯咖啡架, 一塊 3000 蚊0既板, 平3 個%都有成差唔多100蚊架... 好啦, 講完左 Ski 同 Snowboard 都一定要著0既用具, 而家我地講下 Snowboard 專用0既護具啦! 就係... 護腕同護 PAT啦! Snowboard 護腕推介 (Recommended Snowboarding Wrist Guard) 豹豹自己用緊的是 Dakine Wristguard 喜歡佢, 因為我鐘意果種淨係响手心有保護片的wristguard, 而且呢款款保護片唔厚, 載上之後手仲好靈活. 記得記得記得一定一定一定要買大一D既手套呀... 唔係你載左護腕之後就載唔到手套了. 喜歡帶 Inner gloves 的朋友記得都一定要預位呀! 豹豹有個初學者朋友就係貪靚, 買對好靚的手套, 但剛剛好, 完全無位載 wrist guard, 跟住有一次跌親就撞到手腕了. Snowboard 護 Pat (Recommended Pads Shorts) 豹豹自己用0既係: Burton Women's Total Impact Short HAHAHAHA 雖然豹紋好靚, 不過你要失望啦, 我果條係黑色的, 揀呢張相純粹因為我想襯番我個靚靚外號! 所以唔好係雪場度撞到我之後走黎叫我俾條豹紋底底你睇! 香港人主要都係買呢種著係雪褲入面的, 台灣朋友, 我識得的都係揀著係褲入面的, 至於國內朋友... 佢地比較喜歡將美麗0既野同大家分享...好多時都可以見到佢地著呢款的... 我無著過... 所以好難 Comment... 如果你有著過的話, 話我知呀... 其實我覺得都幾 cute 的... 聽聞而家仲多左好多公仔... 甲蟲、Peppa Pig... 第二, 疲勞過度、睡眠不足、宿醉未醒者請勿滑雪! 唔好以為滑雪好輕鬆, 其實滑雪係一種對體力需求好大0既運動. 滑得快, 對你對腳0既大同細0既肌肉0既要求都好高, 因為有好多時候, 你好小0既動作都可以影響好大. 例如 Ski 時一隻腳掌0既角度唔0岩都會令到你跌鑊好甘0既. 滑得慢, 更加會消耗你極大量0既體力... 刨薯仔係極之勞累0既一回事... 而當你一無力0既時候... 就係你最易出事受傷0既時候... 我有一個好叻好 Pro (以前玩比賽架!) 0既朋友就係當佢係幾晚無訓之後去滑雪, 膝頭0既肌肉無力都唔知, 就係一次滑雪0既時候整傷左個膝頭, 十幾個月都唔好... 我有次玩之前果晚因為時差訓唔著, 第二日都死頂去玩, 結果玩幾玩就跌一跌, 連行路去搭Chairlift 都跌到成個冬瓜咁... 又有一次我0有0的感冒, 結果落 Chairlift 時俾個 Chairlift 卡住, 結果係差唔多 3米 高度跌落黎... 連控制個Chairlift 果個人都即時停左架LIFT 跑落黎睇我有無事... 總之一句... 我明白你好難得去到滑雪, Liftpass 又咁貴, 又好難得同朋友咁開心玩, 梗係要飲多兩杯... 但都係果句... 只要狀態一差 (唔夠訓, 宿醉, 唔舒服, 勞累起黎...), 請你休息一日, 養足精神先好再去滑... 仲有! 當你覺得無乜力, 唔好諗住食兩粒止痛藥, 飲兩罐紅牛就再去玩... 其實當你覺得你無乜力, 又或者好勞累0既時候, 已經係你身體話緊俾你知佢頂唔順... 與其勉強自己去玩, 不如俾佢休息多陣... 第三! 唔好乜運動都唔做就即刻走去滑雪! 呢點可以分為兩方面: A) 滑雪之前一定要做熱身運動, 唔好乜熱身都唔做就去滑雪 - 做任何運動之前要做熱身係常識吧!? 對滑雪黎講更加重要, 因為山上面分分鐘下負二十度, 愈凍愈要做熱身, 唔係好易受傷. B) 滑雪之前0既個零兩個月唔該你好去做定運動, 唔好成年都唔郁, 周身乜肌肉都無就學人走去滑雪. 好多時見到好多去滑雪0既人係好明顯無做開運動. 但事實係當你身體無運動開根本無足夠肌肉同體力去支持你係山頂滑落黎... 身體唔夠軟就當然易拉傷. 大腿肌肉唔夠力, 所有衝擊都落晒去膝頭, 咪就係咁整斷條十字韌帶囉. 第四, 請你請教練吧! 我明白, 你好叻! 最叻無師自通! 我知道, 你好醒, 十八般武藝樣樣皆精! 我了解, 你要面, 點可以俾人知道你唔掂! 我理解, 你已經滑得好叻, 你去教人就差唔多! 我都明, 請教練好貴, 不如買塊板好過! 但無論如果, 如果你係初學0既, 我希望你可以去請個教練. 教練最重0既其實唔係教識你點玩, 而係教識你點"玩得安全" 你需要明白, 滑雪係一種太講求動作0既運動, 你動作唔0岩, 代價可能就係你一對磨損你膝頭0既軟骨... 又或者撞爆後腦... 教練會教你點跌, 點玩... 起碼減少左好多不必0既傷害... 如果你叻, 但只要你未叻到去叻得過雪場最TOP個教練果個LEVEL的話, 我都會建議你一或者兩個雪季上一堂, 因為呢個世界其實不斷進步緊, 而時不時有個教練教一0的最新0既知識俾你, 其實對你0既滑雪技術好有幫助, 愈厲害0既教練, 愈可以係兩個鐘入面教識你好多野... 我第一個教練係室內滑雪場教識左我刨薯仔, 點Turn, 點 Link Turn, 點上Snowboard 第二個教練教左我點順滑地Link Turn, 同埋點係Chairlift 落地 第三個教練教識左我點係窄路Link turn, 點係鈄路Link turn, 點玩Half pipe 第四個教練教左我跳, 180, Turn 時唔好踢板同點玩深雪. 第五個教練教左我點Tune binding, 點會滑得靚, 順, 點玩Carving. 最初第一年上左六堂, 之後每個雪季一次, 我而家成個雪山可以講話無乜邊度去唔到. 你塊板唔會話到俾你知佢要點Tune先可以最快, 你點玩先唔會整到... 好啦, 今日講住咁多先... 遲0的再分享我0既滑雪心路歷程! P.S. 我另外寫了一些相關的文章, 也可以去看看: 到目前為止, 我寫過的雪場有: 日本: 北海道地區: 富良野 (寫了三篇: 分別寫了富良野滑雪場的交通、雪場概覽、飲食住宿) 長野地區: 白馬 (Hakuba Cortina 和一篇在八方尾根 (Happo One 的雪具租賃 (Ski Rental) 野沢溫泉 (雪場和周邊環境簡介, 吃飯和觀光簡介) 志賀高原 (寫了二篇: 從 Snowboarder 角度看志賀, 幾年後重遊志賀後寫的) 東北地區: 安比高原 藏王溫泉 (藏王樹冰觀光、滑雪、飲食住宿交通全攻略) 中國 新疆絲綢之路滑雪場 (前言 + 交通篇, 雪道篇) 新疆阿勒泰野雪公園 (阿爾泰山野雪公園)和將軍山滑雪場 哈爾濱室內滑雪場 吉林北大壺 （北大湖) 滑雪場 (一篇前言+交通, 一篇雪道篇 ) 滑雪前的預備: 具體初學者滑雪前怎預備 滑雪一定要帶的寶物: 按摩膏 季前預備 (室內滑雪場和跳台篇) 廣州室內滑雪場攻略 哈爾濱室內滑雪場攻略 日本 Dry Slope 跳台場 Quest Snowboard Academy (埼玉小布施) 泰國室內滑雪場 教學篇: 怎樣選 Ski Boots 滑雪衣物的護理 (Ski/ Snowboarding Jackets and Pants Care Tips) 實用旅程資訊篇: 對有寵物又喜歡滑雪的你十分有用的 Pawshake 日本交通恩物乘車Apps – Navitime 北海道雪場 Ski In Ski Out 住宿大集合: 例如二世古、留壽都、富良野、十勝Sahoro 中國滑雪實用小貼士 豹豹有話兒... 我的個人 facebook 點這裡. 雪豹的 Facebook Page 點這裡. 記得 Like 和 Share 我的專頁哦! 不然我會好傷心的… 我的Youtube Channel 點這裡. 記得 Subscribe 和 Share 呀! 不然豹豹會更傷心的….又要拍又要剪… 好辛苦的… 要轉載上自己網站的朋友也可以, 但能先告訴我一下問問嘛? 或是表明是從我們這兒轉過去嘛? 我寫的好辛苦呀!
