必須要介紹同幫佢大力宣傳嘅一碗麵！！盛岡一直以「盛岡三麵」聞名，而盛岡冷麵就係其中一員。佢嘅口感同體驗好特別，湯底係酸酸甜甜嘅凍湯，用水果、醃青瓜、牛骨同雞骨熬製，非常濃郁清爽。麵條好有咬口、好煙韌，配搭一盤燒肉同泡菜，可以話係一餐有哂甜、酸、辣、咸，味道多變新鮮之餘又唔相衝，真係好難忘！ 背景資料︰呢間企業本身係1940年代做鞋同糖果起家，自1986年麵條高峰會以「盛岡冷麵」聞名後，就係翌年開設冷麵店，所有食材都由盛岡出產，成為當地廣受歡迎嘅餐廳。而盛岡冷麵則係1950年代由韓國傳入，融合咗韓式拌麵、平壤水冷麵同盛岡麵條匠人自創嘅小麥麵，加埋改良後嘅湯底同泡菜，與碗子蕎麥麵同盛岡炸醬麵並列盛岡三大麵。小知識 — 水冷麵嘅friend?相比盛岡冷麵，韓國嘅水冷麵更加為人熟知。分別係，韓國水冷麵用嘅係蕎麥麵粉整嘅細麵，而盛岡冷麵係用小麥粉同薯仔澱粉整的，會更加煙韌同粗身少少，各花入各眼啦～小驚喜︰餐廳貫徹適時適食嘅概念，會根據時令轉用當季食材，咁樣做可以減少用肥料同農藥迫唔啱季嘅植物生長，亦都順應自然，令大家食到最新鮮嘅農作物～呢間餐廳就係夏天用西瓜、冬天用梨子入湯，提升湯底嘅清爽口感！地點︰ぴょんぴょん舎地址︰盛岡市盛岡駅前通9-3交通︰盛岡站B1出口直行
