今年5月到德國的相到現在接近聖誕才去到雪山的部份，都幾應景，不過我寫得越來越慢，真唔好意思．中午接近十二點先到纜車站上面的餐廳食自助餐，不過趁廚師未有食物放上食盤前就被眼前的大玻璃窗所吸引． 好震撼的美景，同厚厚的雲層及雪地只是一線之隔．楚格峰在德語名為 Zugspitze ，Spitze的意思是頂峰，Zug就解作雪崩的意思．在楚格峰山下350米有兩條冰川，與附近山谷形成比較平坦的高原，是德國著名的滑雪勝地． 左面是奧地利，右面是德國． 楚格峰最高點的標誌是在右峰頂一塊大岩石上豎立的金色十字架．沿著有綱索的小徑行二十分鐘可以到達，不過無人到，因為要有足夠的裝備才可行，否則就太危險． 最早的十字架在1851年豎立，不過因氣候因素損毀，而現在見到的十字架是2009年所豎立． 食物種類不太多，只有幾盤，當然在山上唔可以要求太高．個湯幾好味，又係好似牛尾湯，但同上幾次唔同，個湯有肉丸及類似雲吞的東西．最唔好就係由雪櫃拿出來的椰菜，好似食雪一樣咁凍，而且又硬．後來吩咐職員取回廚房再蒸一蒸才入到口..哈哈 ^^ 淋上了奶油的萍果卷特別好味，我都食了四五件．
