灣仔呢間成日排晒長龍嘅手工甜品最近真係燒到我，舖頭以粉紅色為主調，入到去見到整齊擺滿晒當天手作甜點，每一款都標住價錢，有想認真試晒每一件嘅衝動🙂↕️點擊圖片放大 +3 櫻花紅豆大福100% 日本食材製作，外皮用咗「道明寺粉」五割糯米，口感粒粒分明得嚟透亮，最特別係塊日本櫻花葉，入面嘅紅豆蓉用黑糖慢熬過，甜得好清幽，聽講塊葉都成本貴㗎🥸記得連埋塊葉一齊食，鹹鹹甜甜層次好豐富😋芒果卷標榜完全唔加糖，用新鮮芒果最精華部分切片烘乾，食落口陣酸甜味係好濃縮、好天然嘅果香，質地軟糯得嚟帶點韌勁，大人小朋友都一定會越食越上癮🥭芒果卷可以豪邁咁直接咬，又或者好似細個食卷仔軟糖咁拉開成長條慢慢 dap，越咬越出味，係一款會令人食到停唔到口嘅健康零食！香橙朱古力呢啲功夫嘢唔試對唔住老闆娘嘅心機🧡選用時令澳洲血橙，每片都用新鮮雲呢拿籽糖水浸泡再風乾（橙片上面點點黑星就係珍貴嘅香草籽）最後沾上瑞士黑朱古力，苦甜比例啱啱好，橙皮嘅甘香配埋朱古力嘅絲滑，係小眾又高級嘅味道，買返去做零食一流🖤點擊圖片放大 +8 另外呢度嘅千層糕都係必試，斑蘭椰汁糕用咗純正斑蘭葉熬出清香翠綠，配埋濃厚滑順嘅椰汁底，清爽得嚟甜度啱啱好，層次感分明。仲有出面好少見嘅南棗椰汁糕，係專為女仔設計嘅養生甜品，將補血養氣嘅南棗融入溫潤椰汁，甜而不燥，帶住淡淡棗香，食得出食療嘅溫柔💆🏻♀️兩款口感都好Q彈～至於皮薄餡靚嘅獨家秘方糯米糍都係必試✔️重點係每日新鮮手作，賣完就無㗎啦！個皮咬落去煙煙韌韌，完全無厚粉感。必食推介芒果糯米糍，有半個手掌咁大個🥹仲有開心果糯米糍，濃郁嘅開心果醬塞滿晒成個糯米糍，堅果香好突出，仲帶點沙沙嘅果仁碎，口感極豐富；最後芋頭糯米糍內餡呈現淡淡嘅天然灰紫色，質感綿密紮實，配埋煙韌外皮，整體唔會太甜💜甜品唔一定要好複雜，有時呢種帶住手作溫度、注重食材原味嘅小點心，反而最能療癒疲憊嘅心🌿。下次經過灣仔，不妨入去呢間粉紅小店，帶走一份屬於自己嘅甜度啦！
