一直都知MCP 新都城二期開咗間星馬風情嘅茶餐室【玖子茶】但咁耐都未有機會試，屋企今晚無煮飯就去試下佢個二人晚市套餐，包咗兩款主菜、兩款小食、白飯同飲品～店內裝修以簡約木系為主，最吸睛係牆上滿佈南洋彩繪插畫，座位都坐得好闊落舒服。點擊圖片放大 砂煲藥膳牛肋肉一上枱已經聞到超濃郁嘅藥材香氣，湯底味道甘甜順喉，牛肋肉煮到極致軟腍入味，入面仲帶埋啲膠質滿滿嘅牛筋，入口即化，配埋吸晒湯汁精華嘅金菇同豆卜，簡直係白飯殺手🍚食之前記得點埋佢附送嘅辣椒甜豉油，微辣鹹甜嘅味道令牛味更突出，層次感即刻提升！ 泰式炒魷魚 🦑鑊氣十足，將泰式嗰種鹹甜乾炒風味完美呈現，入面加咗靈魂配料：豆角爽脆、蒜頭香口，仲有芫茜提鮮，主角魷魚就爽口彈牙，送飯一流！ 芝麻蝦多士🍤舊蝦多士堅大舊！成個枕頭仔咁漲卜卜，炸到金黃色好誘人添！多士比較軟身，面層蝦膠彈牙，點埋千島醬食好滋味，必點🔥 韭菜餅細細個好cute，炸得好香口，入面韭菜味好突出～呢度環境企理、食物有質素而且份量足，係收工醫肚或者同朋友聚餐嘅好地方，下次會試嚟試埋其他款式！
