國內知名包點品牌三津湯包嚟咗香港都一段時間～成日喺網上見到人推介呢間嘢，秉持現做現蒸現賣理念，心思思想試好耐，但係平時唔係咁順路，所以一直冇特登去。今次經過新蒲崗，唔可以錯過！企咗陣，已經見到人龍冇停過，果然係人氣王！(個價錢平過我預期，有驚喜?) 爆汁包 (三津湯包) $6個果然係鎮店之寶！外皮軟熟，稍微搣開個包，啲湯汁就湧出嚟～另外個肉餡肥瘦配搭得啱啱好，聽講係由精選豬前腿肉製作，肥瘦相間食落唔會膩，而且調味適中，唔會太鹹太淡，食完唔會口渴? 生煎包 $18 /份係我嘅心頭好！外脆內嫩，咬落去湯汁爆漿咁湧出嚟，配埋飽滿嘅肉餡真係正到飛起！海量嘅芝麻亦令到生煎包更加香～點擊圖片放大 +6 除咗包點，三津湯包仲有幾十款點心、家常小菜及其他美食，總有一款啱心水。我就試咗雞絲涼皮，叫咗小辣，個汁酸酸辣辣，味道好有層次，個涼皮滑溜又有彈性，連屋企人平時唔多鍾意食涼皮都食咗好多?另外口水雞飯都只係$22！大震驚～本來以為淨係少少辣椒油，點知開蓋每件雞肉都被辣油包住，肉質仲幾軟滑，份量都唔少呢！最後就係茶葉蛋同韭菜鮮肉餃，餃可以揀蒸或者煎，我揀咗煎嘅，外皮香脆，韭菜同鮮肉嘅配搭好夾，食落好香口，絕對值得試！至於茶葉蛋滷得幾入味，啲裂紋均均勻勻，蛋黃又唔會乾爭爭，平食之選！見到仲有全日優惠，購買任何產品加$5就有檸檬茶一杯，下次一定會再嚟試其他款式?
