大家都知觀塘工廈區有幾多隱世美食，呢間壹.01係CP值爆燈嘅寶藏小店，已經回訪多次，事關佢哋啲台式便當同飯類款款都係大大份量，價錢親民，係觀塘區數一數二嘅抵食推介，最近仲新推出好多美食，睇得出一班90後老闆真係好用心經營！下晝2:30之後，追蹤佢哋IG仲可以享有9折添～ 薑蔥素鰻魚飯鰻魚飯啲茄子燒到香噴噴，淋上香甜濃郁嘅蒲燒醬汁，望落去個賣相真係堅神還原鰻魚飯！茄子嘅質地軟綿綿咁，食落去嘅口感同真鰻魚都差唔多～至於啲飯粒粒分明無黐埋，加埋啲薑蔥同酸菜，成碗飯都好有靈魂💯 辣椒大蔥滷肉飯滷汁調味恰到好處，唔會死鹹又夠香濃。另外用咗青辣椒代替紅辣椒，辛辣味減咗但個香味仲係好濃郁，再加啲櫻花蝦，十分惹味～滷肉飯一向係高卡路里嘅代表，呢度最特別係所有飯都可以轉做豆腐底，非常適合控糖/減肥嘅人士～啲汁撈埋啲豆腐食，無痛減肥之選👀 蘇子素手撕雞一打開蓋，陣陣麻油香氣已經撲鼻而來，係用杏鮑菇做主角，啲質地同食緊雞髀肉一樣，令你感受唔到自己食緊素！個醬汁調味得好香，惹味程度堪比真雞，配埋清甜爽脆嘅青瓜絲，成個配搭令人耳目一新，非常開胃～真係要讚下杏鮑菇嘅「戲子功力」，演繹得維妙維肖😂 秘制厚切蜜汁排骨大大件啖啖肉咁，加入蜜汁食落香甜惹味，排骨外皮香脆地，咬落聽到「咔嚓」一聲，肉質嫩滑多汁，係排骨界嘅天花板級數💯 芋見百寶奶豆腐底層係口感幼滑嘅奶豆腐，上層係芒果、士多啤梨、斑蘭河粉、爆珠，中間仲有一球紫色嘅芋泥～河粉嘅斑蘭香味同色澤都好天然，綿密芋泥入口即溶，配埋斑蘭河粉，層次感十足，啲爆珠係椰子水口味，入邊有粒馬蹄好爽口👆鮮果斑蘭河粉同樣色彩繽紛，由斑蘭葉製成嘅河粉陣陣天然清香，質感Q彈有韌性，仲帶有少少店咸香，配埋香甜嘅菊花糖水好夾；另外啲水果全部都係甜，真係一粒酸嘅都無，喺度比個讚佢哋挑選水果嘅功夫🏆
