燈籠滷味T.P.E 推出二人火鍋套餐，打邊爐控聽到真係心心眼😝 因為除咗有台灣直送嘅火鍋配料之外，仲有四款湯底可供選擇。我哋 揀咗鴛鴦鍋，分別試咗「燈籠招牌滷牛骨湯」，入口有好香濃嘅牛味，濃厚而不膩，仲有淡淡嘅藥材香～ 另外一邊揀咗佢哋自家研製嘅辛香「 台式你磨嗎麻辣鴨血湯」 以燈籠滷湯創作為基底，配合唔同嘅辣椒及台灣直送鴨血等製成，入面嘅鴨血份量頗多，而且大大嚿質感軟腍，吸曬啲麻辣湯好惹味，最特別係提供花椒畀客人自行磨製加入湯內，食得辣嘅朋友一定要試點擊圖片放大 +3 佢哋啲特色火鍋配料亦都非常之出色，台灣人好鍾意喺食滷味嘅時候放包王子麵落去煮，此火鍋套餐亦都特別包有一包王子麵，王子麵比一般即食麵質感唔同，同燈籠滷味嘅滷汁基式特別啱Key，麵條吸滿湯汁十分好味✨另外亦好鍾意佢哋台灣直送嘅麻吉燒～魚糕包住年糕，又煙韌又軟糯。另外仲有香菇貢丸、花椒丸、甜不辣等等；豆類拼盤方面有百頁豆腐、大豆等，當然最值得注意嘅係套餐包有招牌滷肉三重奏拼盤、日本宮崎A4和牛、鹿兒島豚腩同埋美國肩胛牛小排，肉質好靚食唔停，食肉獸至愛🙈
