銅鑼灣希慎廣場嘅food court位於11樓，呢到嘅樓底好高坐得好舒服，仲有超大玻璃窗可以欣賞銅鑼灣城市景觀👀當中「Chatuchak」價錢親民，菜式選擇豐富，仲係由泰國人主理嘅添！一於叫返幾款泰式美食一解相思～ 鳳尾蝦炒金邊粉泰式炒金邊粉屬常見嘅泰菜，賣點係多層次嘅味道。嚟得泰國餐廳必叫🙆🏻♀️金邊粉好大碟，炒得幾有鑊氣，每條金邊粉都係幼幼的，口感好彈牙，而且炒得根根分明夠乾身，唔會變咗一團痴實晒咁，所以好易夾起。 味道以酸甜為主，展現出原汁原味嘅泰式風味，再加埋大隻爽口嘅鳳尾蝦一齊食，口感相當豐富～如果想增加口感仲可以撈少少花生碎，伴碟嘅辣椒粉比較辣，怕辣嘅朋友可酌量添加！ 冬蔭功鳳尾蝦湯大大碗冬蔭功湯配料豐富，裏面有脹卜卜嘅新鮮鳳尾蝦、茹菌及各種香料等。雖然個湯望落去呈鮮紅色，但飲落去味道唔會太辣，個人覺得酸味多過辣味少少，但酸無搶咗辣嘅風頭，反而係酸中有辣、辣中有酸，尾韻又有甘甜，我超鍾意咁剛好嘅酸辣甜比例，可以一口氣將湯通通飲晒😆點擊圖片放大 套餐可加錢配泰式輕食，我就加咗$28配兩件炸蝦餅～蝦餅炸得脆卜卜，新鮮熱辣，蝦膠非常彈牙，而且蝦味濃郁，食得出係真材實料，沾上泰式甜辣醬，甜鮮辣共冶口中，都係必叫嘅item✨炸香茅豬扒 （+$24）大大塊豬扒以香茅醃製，多汁肉腍唔嚡口，入口微微帶有柑橘香氣及酸味，開胃之餘極之惹味👀
