每次去泰國,行程都少不免Terminal 21😌 Terminal 21 係一個以航空設計嘅商場,每一層都有不同國家設計,今次我哋嘅酒店正正喺BTS Asok 站,行過去Terminal 21 唔駛5分鐘💁♀️ 平時主要都係上頂層嘅food court醫肚,但其實商場內有不少優質餐廳,濕平完嚟到想搵舒服啲嘅餐廳坐低慢慢食,一於食盡咖喱蟹肉蛋同芒果糯米飯刨冰🤤點擊圖片放大 +2 《SAVOEY》佢哋嘅咖喱蟹有兩種叫法,一種係即秤嘅活蟹 (按重量收費) 第二種係直接叫現成嘅咖喱蟹🦀 身為懶人,我哋叫咗唔洗剝殼嘅咖喱蟹肉蛋,啖啖肉食得更開懷👍 一上檯就見到份量好大,好有氣勢!首先見到蟹肉嘅份量都好多,摷極都仲有😂 咖哩蛋醬帶微微嘅甜味,估計係落咗椰漿,但唔會好漏~咖喱帶住撲鼻而來嘅香料味道,但唔會完全蓋過蛋香🥚 鮮甜蟹肉搭配上稍微帶甜味嘅咖喱味嫩蛋醬,味道超濃郁!果然大家推薦得都係有原因嘅!另外仲叫咗個炒金邊粉,金邊粉被網狀蛋皮包裹住,仲有配料青檸芽菜花生碎等等,好好味好有鑊氣🔥 《After You》食完飯緊係要直落食埋甜品,呢間Cafe係呢到泰國必訪嘅人氣名店,聽聞每次都排晒長龍,幸好我哋去嘅時候唔算繁忙時間,好快就入得😆 點擊圖片放大 當然,我哋為咗人氣打卡甜品———芒果糯米飯刨冰而嚟啦😙 刨冰尺寸有兩種可以選擇,我哋呢個係baby size,份量輕巧可愛,對於女性朋友或者係想留肚食更多美食嘅朋友簡直係一大福音💞 味道方面係好精緻嘅口味,面頭淋上一層咸咸甜甜好似凝固咗嘅奶蓋,芒果味刨冰則擁有非常綿密嘅質地,用匙羹輕輕撥開刨冰,會見到入面藏有芒果果肉同煙韌軟糯嘅糯米飯!另外會搭配椰漿同芒果醬,隨心伴吃👀 朋友叫咗個Strawberry Crumble,crumble粒粒+香甜微酸嘅士多啤梨醬,仲要係即焗嘅,熱到出煙!加上軟滑雪糕有冰火二重奏嘅感覺,係高質足料烘焙之選🍓雖然已經去過多次泰國✈但泰國總係有令人探索唔完嘅新美食!嗰一刻唔洗理食完之後會肥幾多磅,淨係需要喺特定時間內好專心好專心咁食嘢,難怪去極都唔厭!😂