覺食普通火鍋太過單調,想試吓不乏品味同質感嘅火鍋? 『滾得囍宮廷火鍋小炒』或者會啱你!佢哋係一間主題特色火鍋店,鋪頭裝修用咗中式嘅宮廷風格,裝修典雅,一入門口就見到有張龍椅,好有氣勢~ 望真啲仲有埋宮廷服裝俾你著住打卡添,感覺好過癮!行入少少會見到檯與檯嘅位置空間都幾闊落,仲有屏風隔開,夠哂私隱,無論生意洽談用餐,或者係家庭聚餐,甚至同好朋友食宵夜烚下烚下都好適合㗎🍴 康熙花膠雞湯鍋 眼見佢哋嘅鍋底都幾多選擇,例如卜卜蜆鍋、日本佐賀A4黑毛和牛火鍋等,揀鍋底呢一步可能會令你糾結一小段時間,不過鍾意滋補養顏嘅我就揀咗康熙花膠雞湯鍋,貪佢可享受香濃雞味仲補充埋骨膠原!湯底濃厚足料,係大廚用上龍崗雞每日熬製8小時而成,雞肉份量都幾多,皮脆肉嫩啖啖肉。另外店員仲會即場將花膠剪成細片先放入火鍋,花膠又滑又嫩嘅口感令我一試難忘👀店員亦有細心提示當花膠煮熟時可以飲啖湯先落料,個湯鮮味足又開胃,好飲到我飲咗幾碗🙌 貴妃出浴手切本地牛肉 手切本地牛肉擁有細密嘅雪花紋路,彰顯肉質嘅非凡✨而且擺盤一啲都唔馬虎,視覺上就已經好享受了,原來仲好有儀式感添㗎!皆因會一樽北海道3.6牛乳比你倒入去,將牛肉浸喺牛奶中1至2分鐘再淥熟就OK,係一種我未試過嘅新食法,吸收咗牛奶嘅牛肉肉質嫩滑可口,柔軟嘅肉感令人意猶未盡,細嫩之間更有淡淡牛奶香滲出,好有驚喜呢😝 黃金雙拼 (咸蛋黃炸魚皮及炸響鈴)每件炸魚皮及響鈴都被沙沙粉粉嘅咸蛋黃醬包裹住,雖邪惡但見到又真係好有食慾😙魚皮好香無腥味,亦唔會太過油膩;而響鈴惹味又脆卜卜!浸喺湯中吸爆湯汁嘅精華,既有雞湯嘅鮮甜、又有鹹蛋黃嘅醇厚,加埋魚皮及炸響鈴嘅酥脆,一啖咬落去全部都係滿足😉 手打珍珠帶子墨魚丸 外表色澤潔白嘅墨魚丸口感爽彈,輕輕咬開係肉眼可見嘅帶子肉!手打丸原汁原味地保留咗墨魚肉嘅鮮甜同營養,令口感更上一層樓,必試👈和牛芝士一口餃雖然係一口餃,但其實都好飽滿同幾大隻😮一口餃用上和牛製成,肉質緊實毫不鬆散,咬開餃子會感受到和牛嘅多汁,濃郁嘅牛肉汁水以及略帶煙韌嘅水餃皮瞬間激活味蕾,然後帶有微微嘅芝士味,成個感覺好特別🤩 滾得囍五色蔬菜拼盤 五色蔬菜拼盤共有五種蔬果,分別係蕃茄、蓮藕、節瓜、紫淮山片同薯仔,蔬果夠新鮮,色彩豐富又健康🙋足料竹蔗茅根飲落清甜滋潤,好舒緩到打邊爐嘅燥熱,而且一jar份量都有幾多,大概係6杯份量,解渴必叫❗