平時喺餐廳食一餐海鮮閒閒地都要幾百，仲要撞手神，因為價錢同份量味道唔一定成正比，每人銀包唔厚都埋唔到單，如果喺自助餐有得任食就太好喇😝上網見到『君怡酒店咖啡屋』推出CP值極高嘅自助晚餐及半自助晚餐，除咗有駐場歌手演唱，仲可以任食長腳蟹、 刺身、海鮮，仲有Movenpick 雪糕添😯今次我哋食呢一款係全自助晚餐 (逢星期五及星期六供應) 價錢係$518再7折，計番數都只不過係300幾蚊，長者及兒童更有六折優惠，咁抵嘅價錢睇睇質素如何👀 一入到嚟君怡酒店咖啡屋，見到燈光昏暗有種古典味道，環境偏向有格調，配合現場樂隊演奏都幾有氣氛✨喺現場即刻行個圈先，食物種類方面都幾多下，一時之間唔知道由邊度落手介紹😂有海鮮、沙律、涼菜、壽司、刺身、燒肉、甜品、各式小炒、中湯西湯、果汁、茶飲、新鮮水果... 首先係涼菜小食及各式沙律，我見到有中華沙律、涼拌雲耳、涼薯拌仔絲、麻醬秋葵、水牛芝士蕃茄串、巴馬火腿拼蜜瓜、煙三文魚等等... 款款精緻惹味又開胃，淨係要試齊呢啲都已經唔簡單😆另外各種刺身應有盡有，例如魷魚、吞拿魚、八爪魚、希靈魚、三文魚等，呢度嘅刺身係拉開小趟門自己夾嘅，自由度高又唔使排隊💁 再嚟緊係唔少得佢哋嘅海鮮啦💞有蟹、蟹腳、蜆、青口、蝦等，呢個價錢有咁多海鮮選擇係喜出望外嘅🎉另外熱葷種類都幾豐富，例如清蒸原條魚、蒜蓉蝦、揚州炒飯、芝士焗田螺、西班牙烤乳豬、炆豬手、雞肉pizza、口水雞、粉絲蒸扇貝都有添🤩食到咁上下又不時會有新食物推出 (其中行咗兩轉都發現有新食物上架) 好有驚喜呢😎最吸引我嘅緊係即叫即燒食嘅烤肉啦！廚師將肉類放喺岩鹽板上烤製，岩鹽板嘅高溫瞬間鎖住肉汁，誘人香氣撲鼻而來，推介推介👍 另一驚喜係湯品，中式有粟米蟹肉湯，西式有忌廉蘑菇湯兩款都好好飲🙋甜品方面有泡芙塔、芒果椰子餅、香濃朱古力撻、意大利奶凍、忌廉筒、迷你蛋白檸檬撻、豆腐花等等，更有MOVENPICK雪糕嘅加持，夠哂滿足😏 總括嚟講，呢個價錢真係好抵食，淨係有歌聽呢一個賣點已經吸引到我😙因為現場樂隊表演係非常落力，知道現場有食客生日，更即場演奏生日歌配合，又有提供一張紙仔俾你點唱，好有新鮮感🎶當日我哋聽咗Beyond及貓王等多首耳熟能詳嘅作品，仲有人鬼情未了嘅主題曲添呀🤭眼見現場食客都聽得好陶醉‼『君怡酒店』同尖沙咀地鐵站相距約4分鐘嘅步行距離，交通超方便，而且服務員熱情親切，整體嚟講係一個好好嘅體驗💖下次有長輩或親友生日，我都會想帶佢哋嚟呢度慶祝👌
