扮工室"政治" 立法會選舉岩岩結束,依個時間最岩就係搵啲政治野講下, 不過我想講既並唔係一般係扮工室既女同事爭寵,高層互放暗箭,搞小圈子等等依啲一般既扮工室政治,而係真正同香港人有關既"政治" 每當岀現一啲政治議題,例如選舉、雨傘運動等等,政治總會成為同事們茶餘飯後既話題,以下就等我同大家分享下一啲常見既扮工室"政治家" 藍絲老海鮮 特徵: 50歲或以上,普遍係男性,公司中層分子,衣食無憂 人如其名,老海鮮,Old Seafood,一般係公司老臣子,平時都係一副看透世情既豁達樣,但當有同事講起一啲具爭議性既話題,例如港獨、佔中,老海鮮就會正氣凜然咁話廢青搞亂香港,當你打算同佢展開理性討論,佢就會開始拋書包講內幕,但內容離不開黑金、外國勢力、中共點點點好,然後用一句"你仲後生,唔知咁多野黎"KO你,等你無力反駁 激動新鮮人 特徵: 8,90後,生果日報讀者,最明顯特徵: 未上車 激動新鮮人往往係老海鮮既長期宿敵,佢地之間既辯論每次都係不歡而散,有時仲會激動到忙記左對方係公司中高層,大大聲鬧佢 其實佢地咁激動,正正就係社會不公義既指標,試問如果唔係對社會咁不滿,又點會大膽到連自己腦細都鬧埋...未死過咩... 超級世界仔 特徵: 無特定政治立場,風吹邊邊就擺邊邊,邊個贏唔緊要,最緊要我上到位 世界仔一般無乜生活壓力,所以對政治亦唔多關心,一般睇(面)書睇得多,所以乜都可以搭咀,最厲害既地方係,佢對住藍絲腦細可以話你係廢青,對住你又可以話腦細係過期海鮮,但最恐怖既係,佢唔知幾時為上位插你一刀,送你上路 空空大師 特徵: 有個有錢老公,番工當賺私己錢,對政治一無所知 空空大師人如其名,對政治空空如也,平時既喜好就係儲印花、買化妝品同同事講事非, 當你問佢選舉投邊個,佢會反問番你有咩人,仲要你解釋埋每個人既性格,特徵同做過啲乜 但當你講到一半,佢又會突然同你講"乜咁煩架,是但啦" 然後繼續講番今個星期邊到做特價 如果你公司有依啲同事,歡迎你tag佢岀黎 (不過如果佢係你腦細就小心啲啦) 最後最後,如有雷同,實屬不幸!! Facebook 專頁: https://www.facebook.com/officecrab/