4月13日當晚應朋友邀請參與一場嚮牛津道舉行既足球友誼賽, 小寶都有隨行, 希望觀賞我踢波之餘更加想一齊投入比賽氣氛, 而呢場波應該係我自2021年以來首次足球運動. 友賽初期頭由於欠缺守門員關係, 於是我主動要求擔任此位置當作熱身,參與左比賽15分鐘後就跟隊友互換位置而改打以往最佳位置-右翼衛, 我不斷走上走落去參與攻防, 踢左大約10分鐘左右, 我嚮中圈位置截獲對手皮球, 當打算用左腳將球轉方向給隊友組織反攻之際,頓時右腳好似被人從後踢左一下, 而頭又好似比人打左一下 "閃一閃",同時聽到"啪"一聲, 與此同時我已經應聲倒地, 而環顧四周根本伙其他人,我未知道到底發生咩事, 只知道右腳已經失去力量, 想嘗試企穩但感覺右腳似踏在浮沙之上, 完全失去重心, 嚮隊友撐扶下一步步返回看台休息.明顯此時右腳掌已經不再受控, 小腿鬆弛及非常痛楚,但自己又未意識到其嚴重性,以為只係扭傷下或者熱身不夠, 休息完換好衫仲一步步同小女坐的士到九龍城醫肚,食佢最鐘意既越南河~~哈哈哈. 醫飽肚埋單後, 正想站立離開之際感覺到腳痛未止之餘, 原來全身已經不知不覺地流冷汗, 莫講要離開歸家, 就連行一步都痛楚萬分,呢個時間我意識到事情不簡單, 睇來傷勢唔輕,我需要去急症室. 我用盡全身力氣去逐步逐步上的士,先係送小寶到屋企樓下讓佢自行回家, 而我再靠意志力及所剩無幾既體力支撐去到將軍澳醫院急症室. 在自行辦理登記手續後, 醫護人員提供輛椅及冰袋讓我稍事休息及消腫,靜靜地坐在一旁等待見醫生. 等左大約兩小時終於可以見醫生, 經過反反覆覆個多小時既觀察及檢查後,醫生證實我既右腳跟腱斷裂, 需要入院留醫及排期做手術接駁. 入院當晚立即用石膏去固定斷裂位置,防止造成二次傷害,而醫護人員翌日就安排到最快嚮4月20號做手術接駁. 手術安排於4月20號早上10時左右進行, 我選擇左全身麻醉去做, 當一覺瞓醒時已經係下午1點半. 4月21號當日出院, 清楚自己已經消瘦不少. 手術既三處傷口位置, 埋口情況理想.5月4日, 剛好係手術後第14日, 下班後到屋企附近診所拆線及清洗傷口。 5月5日, 請假一天到醫院換上跟腱靴. 5月6日, 穿著住新既跟腱靴去送我兩位寶貝女兒及太太機去溫哥華. (之後未來個半月就只剩底我與狗生活) 5月8日預約左到醫院做第一次既物理治療, 由於跟腱未能負重, 所以只係做電療及伸展動作配合. 5月9日, 第一次著跟腱靴返工, 以為自己著左隻靴就可以單柺返工, 點知只係自己一廂情願既想法, 右腳仍然未能負重受力, 根本唔能夠成為支撐點, 還記得當日幾經辛苦一柺一柺先返到公司, 亦幾辛苦先可以放工順利返到屋企. 為左防止肌肉流失及更快更有效地康復, 平時嚮屋企就會用跟腱靴上既魔術貼帶扣好啞鈴去做提腿動作, 藉以訓練大腿及小腿肌肉, 每日訓練5組, 每組15下. 5月22號下午約左到醫院矯形部, 替我靴內既鞋墊更換高度, 意味著我右腳只差一點點就可以再更接近原本屈曲角度走路. 5月23日嚮更換左鞋墊高度後, 第一次感受跟腱果種拉扯感及久違了右腳用力既感覺。6月5日開始嘗試用單柺配合跟腱靴日常出行, 右腳力量明顯改善左.6月19日終於可以完全除哂所有保護裝備, 就連單柺都唔駛再用, 由於右腳跟腱仍然未完全康復,行走時仍然有一定程度既拉扯感及痛楚,所以需要相信小心及行動緩慢, 以免再次令跟腱受傷,久違了既著地感..................踏入左7月, 跟腱康復進度有點樽頸既感覺, 有點遲緩,未知道何時再能跑步...(7月6日更新)