今個新年前夕寫呢段文相當之百感交集, 先係正苦強行於1月8號正式跟內地通關, 嚮疫情未受控下讓內地人進出香港,無奈! 其實病毒未必最可怕, 大不了感覺似重感冒咁, 最可怕莫過於內地人種種既生活文化, 所到之處總會留下令人"深刻既印象". 大哥一家上年10月舉家移民英國, 今年既新年少左佢佢地一家四口, 對於未能夠齊齊整整過年, 總有點失落. (2012年大年初一,當時三位大家姐) (攝於2013年, 當時仍然只有三個大家姐) 今個新年更加可能係我大女跟我地過既最後一個新年,大女將會嚮5月離開香港到加拿大讀書生活, 日後能夠放長假回來既日子相信只有聖誕節, 加上如果衰女嚮當地完成學業後又搵到合適工作, 隨時可能2,3年先返來一次, 所以說成係同我地過最後一個新年都無錯. (2017年大年初一, 我家姐(圖左上)當時已經身懷佢二公子-朗仔仔) 對於我地後生既一輩, 對於別離我地可以消化及適應, 但對於我阿媽,相信多少年都未必可以接受到, 老一輩既人好著重團團圓圓, 好喜歡大時大節齊齊整整, 熱熱鬧鬧咁一齊過, 還好現今科技先進, 教識左佢老人家使用智能電話大概可以解決到越洋"見面"呢個問題, 大哥每日英國時間早上11點就會打視像跟老媽子見見面, 傾下英國生活日常, 雖則身在外地, 但感覺仍然好接近,唯一欠既就係一個實在既擁抱同埋媽子身體有任何不適都需要既按壓. (呢個工作, 交比我應付得來) (2022年新年) 其實將來要湊齊人影大合照, 應該有點困難, 不過樂見大家有自己既方向目標, 行自己想走既路, 已經好開心. 相信我老豆在天之靈應該最想見到呢一刻.