終於終於去箍牙啦！我由幾年前開始已經想箍牙，因為我本身係深咬合（假哨牙），好多年前都有出去咨詢醫生，個時係問傳統鋼個種，但個醫生個時同我講整完都唔會好大分別，所以個時打消佐念頭。好後悔聽佐個醫生講冇去做，應該問多幾個醫生意見，浪費佐咁多年先箍。 近排再同我朋友傾開大家都想箍牙，所以就約埋一齊去問下幾錢，我地年紀都唔算細所以唔太敢箍鋼箍見人，所以我地都係去問隱適美幾錢，第一間去佐旺角雅蘭咨詢，因為上網見有人話箍佐3萬幾，可以做介紹人介紹我，咨詢費連照片$500，後來先發覺係依間牙科既打手，上到去完全唔係個個價錢，$45000全包，我朋友嚴重啲要成$50000幾，之後我同朋友分開佐係唔同地方問價，佢最後係長沙灣做隱適美，$45000左右全包，但因為我見佢個間係超多人可能每次去都要等好耐，同埋好似個設備未到好專業咁，我就冇join到。 咁岩我有個朋友介紹話尖沙咀亞太中心有間箍牙好pro，咨詢唔洗錢咁緊係上去問下，最後講價講到$41000包拔牙（唔包補牙），因為我全數俾先平佐$2000（$4萬1已經減佐），我諗住都係分一年半時間就唔分，減$2000著數，同埋完成箍牙後要加$3000固定器（最後找數），講真其實間間個價錢都差不多，但點解我最後會join依間，一黎環境真係幾好，有個休息室俾你戴牙套，然後因爲我都有做過幾間咨詢，見到佢咨詢既過程係好專業，未join已經幫你拍晒片，然後俾2個plan你，第1個係磨梳啲牙等啲牙有位走，第2個係拔4隻牙，2個plan都會有個video俾你睇返你啲牙最後會排成點，啲牙肉移到幾入都見到，第1個plan會平啲，但我揀佐第2，因為佢移既空間多好多，雖然真係貴幾多！ 但依間野都有令到我好嬲，咁咨詢完有個女人會同我傾價錢，佢當初口口聲聲話拔智慧齒都包，我朋友同我一齊入去聽價錢，我地叫佢再double confirm我個plan係咪真係包埋拔智慧齒同所有費用全包，佢都有入到房問，點知出到黎簽單既時候佢先同我講唔包補牙，心諗算啦都唔係爭好多姐，但到我第2次上去簽一份同意書既時候，換佐另一個女人同我傾，佢同我講唔會包家喎，講到口水都干都冇用，之後我再whatsapp問返當日同我傾個個女人，佢話係誤會，佢個日同我傾既意思係會包我拔智慧齒但要收費，真係明白就算double confirm都冇用，冇白字黑字證明到，蠢佐，但之後我冇再見過依個女人！ 如果有興趣都可以inbox我！我之後都會keep住寫我箍成點
