媽咪生日話想食韓國嘢 於是即刻上網SEARCH 吓有無啲近近地嘅韓國餐廳, 發現元朗哩間119 KOREA STATION啲嘢食都幾吸引 , 裝修又過癮就決定試試佢 哩間餐廳原來開左3個月都未夠而且仲好受歡迎 , 上網見有人話試過等成3個鐘先入到座 , 梗係唔可以要媽咪咁等法 , 諗著打電話訂位但好可惜佢地暫時係無訂位服務 , 不過! 佢地有得透過APP去拎飛攞位 , 係APP STORE 下載一個叫FOOD GULU既APP , 再SEARCH 119 , 之後就可以按人數去拎位 , 係APP度可以見到仲有幾多張檯就到你 , 就到既時候又會再通知你，都幾方便 ! 哩個APP入面仲有好多餐廳都有份架 , 下次食飯可以睇吓有無你想去果間 , 拎定飛就唔洗去到等咁耐啦 點擊圖片放大 +3 119係韓國當地嘅緊急求救電話，再配合餐廳既消防佈置STYLE , 嗱 堅係有FEEL架 //我自己就好鍾意啲韓國餐廳用哩款汽油桶造型既櫈 , 有FEEL又方便 放哂啲袋入去唔洗阻訂 又唔洗吸到成陣油煙味 , 雖然哩度唔係食韓燒 每張檯都有叫野食既紙擺係度，睇完劃好俾店員(其實我就略嫌唔環保喇....)不過有好處既 , 就係方便快捷唔洗你一路講佢又一路入 , 亦都避免左職員落漏單 , 因為每次收紙都會即場同你對一次 , 不過都係果句啦 唔環保:( OK 遊完咁耐花園 係時候直入主題 好打耳呀點解嘅 ! 基本上每檯都只少點一杯哩個咁浮誇嘅CIDER RITA , 其實即係7喜溝桑莓/豐梨/柚子 , 我今次就揀咗柚子 , 講真飲落真係無特別 , 不過為左佢個造型我係願意俾＄38會一會佢 , 女人係咁易呃架喇 , 另外仲有DRY B RITA ＄48，即係啤酒溝桑莓/豐梨/柚子 , 都係浮誇地成枝倒轉插入杯 , 一大杯夠兩個人SHARE飲 由於我係芝士獸 , 哩個絕對係必食: 鐵鏟芝士排骨 (半份 ＄128/全份＄198 , 可揀唔辣/小/中/激辣) 我地哩個係半份 , 剪開有6件度 , 滿滿芝士碎再加栗米粒放係排骨下面 , 等芝士溶唒之後就有店員過黎幫你剪好再捲埋芝士 , 一舊俾滿滿芝士包圍著既排骨就食得喇 , 唔係講笑 D芝士真係多到可以撈埋其他野食 *重點係啲芝士香得黎唔膩 * 芝士控嘅朋友絕對要試 , 將D芝士拉到長一長果陣 有一刻會以為自己擁有全世界 , 係 我係誇張咗嘅 , 半個世界度囉 , 但同行嘅嘴刁怪都覺得真係唔錯 , 所以值得試㗎 水冷豐梨巴馬火腿＄58 , 取代哈蜜瓜 用左梨去夾PARMA HAM ,件事係新鮮嘅 , 但個梨都雪得幾硬...足足擺左係度成餐飯先食到 , 哩個我唔太推 除非你好熱愛梨類或者係糖類愛好者 , 如果唔係真係太-甜-了 鐵鏟芝梨炸雞 ( 半份:128 /全份:198) ** 5月15前喺OPENRICE有COUPON 只要落單前SHOW俾職員睇有半價呀 咪蝕** 炸雞+芝士忌廉白汁+大大舊CREAM+蕃薯蓉=邪惡 , 但肥妹就係唔識死的 , 大大啖啪入口, 嗚呀 炸雞 但我個都敏俊XI呢 , 不過可能係我牛屎妹性格啦, 成份嘢最吸引反而係底既蕃薯蓉, 甜甜地但唔OVER , 我同媽咪兩個唔嚐甜既人係半飽死狀態都繼續食 , 據聞係韓國蕃薯整架 , 唔通真係泡菜國嘅嘢零捨FRESH ? 弘大飯卷 ＄48 , 同一般紫菜包飯無咩分別, 無驚喜, 但唔油係加分嘅, 最怕油LUPLUP既包飯 燒濟洲鯖魚 ＄88 韓醬炒雜菜＄58 味道幾好又爽口 但個人認為咸左少少 唔知係咁啱失手定點 火山燒茄子 ＄38 有驚喜既 可能我鍾意食辣所有中哂我個胃啦 好足肉碎 私製泡菜 ＄28 唔食得辣既人應該會鍾意 因為我阿媽都鍾意 少少甜 燒肉生菜包 ＄58 驚喜不大 我個人鍾意自己落手包多D 自己揀加下哩樣果樣開心D嘛 真露煮蜆＄68 粒粒有肉食 唔會BB蜆縮哂水 我阿媽話幾好飲TIM WO 個底 熔岩爆豚肉 ＄58 上面個蛋值得讚, 生熟啱啱好 但泡菜略嫌淡左DD // 好 睇到哩度你會發現我虎頭蛇尾左, 唔係啦噓！ 而係有D真係唔太特別無咩好講 , 老實派架嘛我, 二黎我已經飽到反艇 , 後期有D 都唔太記得咩味, 影相都拎唔到FOCUS 好顛 總結: 如果係鍾意呃LIKE既港女/ 芝士控朋友 /元朗/新界西居民一定要試啦, 更何況依家都只係開張左三個月左右 , 食物質素應該會繼續有所改善 , 而且119 D 職員都好NICE , 雖然忙到踢哂腳 , 但佢地都會好快就見到你既需要而過黎幫手 , 價錢中等 比市區抵食啦 , 元朗愈黎愈多特色食店 , 值得支持 地址： 元朗西菁街9號富盛大廈地下95-100號舖 電話：3565 6911 分享鉛筆。 NO41// 四十一號的吃喝拉撒 https://instagram.com/number.41 https://www.facebook.com/no.number.41 miss.no.41@gmail.com
