簡介 相信留意開JRPass嘅朋友都聽過<東日本，南北海道>Pass, 國外買都要成26000円，差唔到成二千蚊，都幾貴吓。但佢嘅範圍好大，幾乎包含半個日本，北至札幌小樽，南至東京近郊，而且係彈性14日揀6日嘅Pass，都幾正吓。 而2018年兩間JR再推一張叫<東北，南北海道>嘅Pass，由新白河起至札幌小樽，方便喺仙台或北海道進出嘅旅客。範圍收窄咗，售價當然親民d，國外賣19000円，比東日本南北海道version平足7000円，但使用日期收窄為14日內任選5日。 好消息係JR東日本，JR北海道兩間公司出嘅旅客Pass都係包普通車指定席，上述嘅呢兩張合作推出嘅Pass亦唔例外，只要預早去綠色窗口劃位就可以確保有位坐。 使用範圍 (來源：JR東日本北海道) 在自由區域內，均可無限次免費乘坐以下各公司的特急(含新幹線)、急行列車、普通列車(含快速)的普通車廂指定席。 JR北海道線（道南地區） JR東日本線（東北地區）（含BRT*） 青之森鐵路線全線 IGR岩手銀河鐵路線全線 仙台機場鐵道線全線 注意事項 * BRT為公車捷運系統的簡稱。 部分區間及列車受東日本大震災等影響而停駛。 JR 東北・南北海道鐵路周遊券無法搭乘JR巴士。 此周遊券無法搭乘五稜郭到木古內的道南ISARIBI鐵道。 不可使用的設施 JR 東北・南北海道鐵路周遊券只能乘坐普通車廂。無法乘坐綠色車廂、GranClass、私人車廂、專線列車LINER、臥舖車廂。 使用綠色車廂、GranClass、私人車廂、專線列車LINER、臥舖車廂時，尚須另行購買特急列車和臥舖車廂的車票。詳細資訊請向車站工作人員查詢。 (來源：JR東日本北海道) 車廂方面，呢張Pass包特急列車同新幹線嘅指定席，快速列車當然ok，例如札幌至新千歲之間嘅快速エアポート號都可以劃指定席。冇劃位嘅就可以搭自由席，但要留意有部份路線係全車指定席，例如北海道新幹線，記得要預先劃位。 地域方面，由北海道嘅札幌小樽至福島縣新白河都可以搭。超越咗限制區域點算？出閘行人工通道補返差價就得。用得呢張Pass大多都應該會去齊東北+北海道，如果淨係想去東北就可以考慮JR東日本推出嘅東北地區Pass，同樣14日任選5日，同樣19000円，唔包北海道但可以向南延伸至東京近郊，仲可以選擇喺東京上落機添。相反，淨係想去北海道嘅可以考慮純北海道Pass, 包含全北海道地區，但個人認為性價比冇咁高，3日Pass已索價16500円，加多2500円就可以落埋東北而且再upgrade上多彈性5日制。但如果想去道央、道東、道北嘅就冇選擇，只有純北海道Pass可以到達。 實戰範例 我2019年頭嘅Trip都係用呢張Pass，新千歲進出同時會落青森，去齊函館青森洞爺小樽先再返札幌。 自製指定席 list 提升劃位效率，減少溝通阻滯。 Day 1: 新千歳空港→函館 (搭スーパー北斗) Day 3: 函館→青森→函館 (搭北海道新幹線) Day 4: 函館→大沼公園→洞爺湖溫泉 (搭兩程スーパー北斗) Day 5: 洞爺湖溫泉→小樽 (スーパー北斗再轉快速エアポートU-Seat) Day 9: 札幌→新千歳空港 (搭快速エアポートU-Seat) スーパー北斗嘅指定席好full，可能因為季節，預早兩日依然劃唔到位。Day4函館去大沼公園劃唔到指定席，要坐自由席。以上行程車費原價合共37,920円。 北海道新幹線坐席 總結 呢張東北南北海道Pass勝在可以搭新幹線同指定席，可極速回本，比唔經東京嘅人有一個更平嘅選擇。但呢張Pass嘅價錢已經係所有周遊券嘅頭幾位，19000円仍屬高價Pass。 而且只有目標為東北+北海道嘅旅客先可以用盡呢張Pass，如果目標係淨北海道，或者淨東北嘅話絕對有更好嘅選擇。 1. 目標東北+北海道，東京進/出： 東日本，南北海道Pass 2. 目標東北+北海道，非東京進/出： 東北，南北海道Pass 3. 目標只有東北： 東日本東北地區Pass 4. 目標只有北海道： 純北海道Pass 想去北海道又想玩北海道，而有唔經東京進出嘅朋友，呢張Pass絕對適合！
