話說之前去完Lancome x BE嘅分享會後，都幾心動要買番支小黑瓶用吓，然後個活動又有優惠券（冇影），就諗住心動不如馬上行動，所以喺優惠期限前一日去咗指定地點（時代廣場專櫃），點知。。。 我：我 L：Lancome 我：「唔該，我想問下優惠1、2、3可唔可以一齊用架？」 （註：優惠1 係join member 有sample送，優惠2係購物就送修眉、優惠3係買小黑瓶送sample） L ：「優惠不可以同時使用！」 （過程唔太記得，總之就係優惠1同優惠3可以一齊用） 我：「咁啊。咁我要呢個」 （指住張優惠券） 跟住其中一個lancome職員就好快咁執齊d嘢，同一時間，另一個就幫我look”卡。然後我就發現有唔妥： 我：「點解你俾我支嘢係30ml嘅？」 L ：「你唔係要30ml咩？」 我：「。。。嗰度寫50ml架喎」 L ：「係 marketing個邊搞錯，呢個係30ml 架。。（另外兩個都幫口，我大致聽到幾個關鍵字： email、通知、打錯、好早、電話）。」 我：「咁即係點？」 L ：「係 marketing個邊搞打錯左，如果有客拎呢張纸，要我哋通知番d客！」 我：「咁你地頭先又唔講？」 L ：「咁你買唔買啊？」 （我已經無奈，已經“look”咗卡，然後咁問，究竟想點？） 。 。 。（過咗一陣） L ：「一係你加$210,我攞過支50ml 俾你囉，咁你而家想點？」 （佢見我影張纸相，個人就面色一變，） L : 「其實而家真係好優惠，join member 有嘢送，我地得返好少架啦，聽日嚟就冇啦。balabala。。」 （我見自己山長水遠咁去到銅鑼灣，無理由唔買架，就頭腦一熱咁買咗） 之後我去咗隔離sogo問，然後就仲唔“gur”，原來sogo都係有差唔多嘅優惠 嗱。。。有圖有真相！ 其實去之前我係有打過電話過去嘗試問嘅（因為張紙上面有寫 請事先預約 咁上下嘢）點解話係嘗試，係因為我打咗過去，確認咗係lancome 時代廣場職員之後，我讀咗個title，再問優惠1、2、3可唔可以一齊用嘅時候，對方答「我唔知你講乜，你嚟counter問啦」 （當時該職員都冇同我講過marketing 部門make咗mistake 或者幫我問其他人。。） 我自問唔係一個撩事斗非嘅人，但返到屋企真係越諗越唔對路。真係幾難以想像，咁大間公司；咁知名嘅品牌，員工嘅態度竟然可以咁差，我唔係喺花園街啊！？同埋有d不明所以，好似客人係應該知道佢哋公司內部文件咁（有“吓。。。你唔知咩”嘅感覺），其實都幾神奇。 認真講，係人都有做錯嘢嘅時候，情緒係人都有，黑面係人都會，但係竟然會用好似騙局咁嘅手法【扮無嘢】，我問都係咁嘅態度，咁我唔問係咪就會當成冇呢件事呢？最灰係全程連一句「唔好意思」或者「對唔住」都冇，所有元素加埋一齊真係令我好憤怒 （諗應該冇幾多個人會唔嬲囉）！! 同埋真係好唔明點解佢哋公司內部發生溝通問題，當災的竟然會係d客人！？唔通佢哋就冇更好嘅處理方法？我從來沒試過買完嘢之後心情咁差，真正做到貼錢買難受！！
