嚟到最近喺佐敦大熱勁多人打卡嘅餐廳「蝦蝦燒」。呢度嘅蝦即夾即燒，包你一定新鮮，佢哋仲會不時將啲就死或死左嘅蝦整走。佢哋嘅蝦新鮮肉質彈牙，仲隻隻都好大，啖啖肉，好過癮，再加埋佢嘅泰式辣汁就更加惹味。而出面嘅自助區都好豐富，入面有多款串燒，新鮮嘅海鮮，熱盤，醬料，飲品同甜品。串燒真係有好多款，足足有三大個保鮮櫃，整齊排列，方便我哋拎之餘，又乾淨衛生，食都食得安心。而咁多款入面羊架就係我最鍾意最值得encore。佢哋厚度啱啱好，油脂含量又夠，燒起嚟唔會太乾，油香滿滿，加埋佢哋嘅孜然粉就更好味，肉味更突出。海鮮種類都幾多，有多種貝殼類海鮮，好似有蜆，蠔，扇貝，螺等等，仲有原條嘅魚，魷魚等等，而扇貝我就最鍾意，加埋牛油蒜蓉一齊燒，鮮味之餘，味道更加豐富。飲品方面佢哋有三個大雪櫃整齊放左多款嘅飲品任君選擇，有汽水啤酒，亦有茶類果汁，應有盡有。而最後嘅甜品就有多款味道嘅雪糕，呢次就拎左玄米茶同港式奶茶兩杯，茶味都幾出，最啱就係食完啲油膩野之後食返杯清涼嘅雪糕解解膩。點擊圖片放大 +7
