之前在網上看到有人分享$138就可以食到點心放題，冇乜伏評，個個都話好正，心諗有冇咁抵啊？前日就同朋友去試試佢，睇下係唔係真有其事！.點心紙上面嘅選擇都幾多，除咗傳統酒家都會有嘅蝦餃燒賣之外，令我驚訝嘅係竟然連鹽酥雞同醉雞卷都有，咁就一定要嗌下喇。 台式鹽酥雞，外皮炸得好鬆脆，亦唔會話太鹹，但略嫌炸得太乾，可以juicy啲。推薦程度：3.5/5 花彫醉雞卷，賣相唔錯，食落都頗有雞味，雞肉都算嫩滑，但我自己本身比較重口味，覺得味道有啲過為清淡。推薦程度：3/5 金磚豆腐粒，呢個只能講做得好出色，外脆內軟，味道十足嘅外皮配合豆腐嘅口感，熱辣辣咁食，一個字，正！推薦程度：5/5 金沙熊貓包，唉其實放題唔應該食啲咁頂胃嘅野，但我同朋友都好中意食流沙包，忍唔住叫咗一人一隻，味道唔錯，流沙唔會話淨係得甜味，食落好舒服，最衰我哋冇即刻食，食嘅時候有啲凍咗，但整體都符合期望。推薦程度：4/5.整體嚟講有超出我同朋友嘅期望，冇諗過呢個價錢食到呢個質素嘅食物，員工服務態度亦相當熱情同好客，重點係食物上菜速度好快，唔會話靜靜雞唔俾你食咁多。.食物質素：4/5服務質素：5/5CP值：5/5.**整體推薦程度：5/5
