人在外，想周圍去又唔知點去？又唔想俾的士司機開天殺價？如果你有當地電話號碼、懂英語，可以試下玩Tootle，隨時仲可以識番個當地朋友。 尼泊爾主要路口好多時都塞車，加上小巷多，電單車就岩晒喇。確認要車後，唔使一分鐘就有回覆，司機黎接載前打左個電話俾我確認位置同時間，我唔太識尼泊爾文，直接用英文，佢都講到幾句。今次既司機係個25歲大學生，唔使上堂賺下外快咁，行車期間大家有講有笑（基本上尼泊爾人都係好易熟），不過留意番當地法例只規定司機要載頭盔，所以用家有需要時可先在電單車舖租。 Tootle使用流程簡單，而且可以揀淨係要女司機，連1個鐘之後出去都可以book定先，係幾貼心，不過就同Uber一樣，法例未有保障咁。 Tootle使用流程： 1. 以尼泊爾電話號碼作登記，系統會傳送registration code到該電話作核實，而call車時司機亦會致電該電話號碼作確認 2. 系統會自動顯示你的位置，用家選好上車點、落車點後，系統會顯示行車距離及收費 3. 用家需揀選只由女司機接載或男女不拘、付現金或系統設立的Tootle Balance、馬上要車或15、30分鐘後或1小時後 4. 有司機認投後，系統會於用家電話顯示一個code，行車完成後用家需告知司機該code以代表完成交易 5. 根據我的經驗，司機接載前會致電用者確認一下你的位置，不太懂尼泊爾文既話，司機都大機會可以用簡單英語對答，或者建議可以附近酒店或較易locate的位置作上車點
