有謂不時不食，但去到日本就時不時都食，由道頓堀行到心齋橋筋，差唔多咩都有得食。 道頓崛嘅蟹道樂係每次必去之選，當中嘅蟹刺身更加係必食，喺香港食蟹刺食實在冇咩選擇，嗰度D刺身又鮮又甜又抵食，冇理由唔食！食埋shabu shabu, 真係大滿足！ 一風堂喺大阪嘅名氣稍遜，但拉麵一樣冇失準，最欣賞佢成枱都係配料，D餃子真係好好味，一啖一粒叫完再叫，正！ 點擊圖片放大 另一間叫金龍嘅拉麵店喺道頓堀，每日行過都爆滿，終於有日一大朝早去，竟然搵到個位坐低，豬骨湯底濃稠，麵質彈牙，落幾片泡菜，加埋開放式嘅設計，喺寒風颯颯之中食碗熱辣辣嘅拉麵，別有一番風味。 鱆魚小丸子當然唔少得，今次食嘅有D特別，係一盒小丸子上面打隻蛋，加一層沙律醬，最後密密咁灑上大量蔥花，真係一試難忘，下以有機會再番兜！ 大阪王將餃子，主打中國菜，喺心齋橋筋嘅大丸附近，餃子好食，但名氣太大之下我嘅期望亦太高，我非常鍾意嗰度嘅秘製辣椒油，絕對係誠意之作。 自由軒係大阪另一名物，嗰個咖哩生蛋飯雖然極盡麻甩，但非常好味，老闆娘嘅髮型同妝容十年如一日，實在係大阪另一大景點。 有一間串燒連鎖店，去過大阪嘅人唔會唔認識，就係門口有個阿叔拎著兩枝串燒打交叉嗰間，示意食客唔好將食過嘅串燒放落醬汁度，D串燒都幾特色，味道唔錯，但絕對不而多食。 最後一間食黑毛和牛，午餐冇燒肉得定食，有一晚叫咗一碟牛嘅稀少部位燒，好平好抵食！記憶所及，好似係喺大丸附近嘅橫街...
