香港其實都有好多有質素嘅日本嘢食 1）大阪王將餃子喺大阪薄有名氣，香港都有得買佢D生餃子自己煎，味道唔錯；但我最鍾意嘅，都係本店嘅味自慢辣油，真係好有風味！ 2）源自博多嘅一風堂，初嚟香港報到就大排長龍，香港嘅一風堂我就未食過，反而去過大阪同北海道嘅分店，人少好多。一風堂拉麵嘅湯底好有誠意，加上枱上大量配料，的確好滋味，佢嘅一口餃子都好好味，忍唔住一個人食幾碟！其實一風堂有出杯麵同包裝麵，自己都可以喺屋企炮製出一碗別具風味嘅拉麵，喺大部分日本機場都有得買，白丸¥500，赤丸¥550。 3）大坑嘅達磨拉麵，曾經係區內嘅寵兒，但自從隔離街開咗另一間特色拉麵店，以每日限售30碗魂之一杯作招徠，達磨嘅人氣瞬間被分薄。其實我唔似一D朋友對拉麵咁著迷，對唔同派別嘅拉麵有深厚認識，每次都係慕名而來，但不得不承認，我都係超級鍾意食拉麵！但達磨嘅拉麵就真係好普通，湯底冇層次，麵質唔夠彈牙，其他材料尚算可以，單靠明星效應冇真材實料好難留得住客人。 4）呢間小小嘅舖頭喺2條街已經有2間分店，以前曾經特登入將軍澳食，為嘅就係呢一碟火炙三文魚腩壽司，三文魚又厚又大塊，入口即化，正！但近來食物質素每況愈下，已經好少再去。 5）沖繩菜色別樹一幟，喺香港專食沖繩菜嘅餐廳唔多，太古城多日本人聚居，嗰度就有間咁嘅日本餐廳，海葡萄，苦瓜，agu豬都有得食，我覺得最特別嘅都係呢個花生豆腐，據講佢並唔係一舊豆腐，但texture就好似，加埋香濃花生味同個source, 真係冇得頂，值得一提就係佢D刺身都好鮮甜，正！ 6）和宴，係一間比較正宗嘅日式燒肉店，同伊呂波差唔多，嗰度食和牛唔算貴，仲有好多部位選擇，食過和宴，唔會再去盛八牛角等等。 7）德美壽司，提供價廉物美嘅和食，餐廳冇咩個性，但一般水準都好高，值得一試！ 8）天勝係一間好地道嘅日本餐廳，中價，有唔少日本地道小食可供選擇, 拖羅正! 點擊圖片放大 +4 9）大阪同天勝有D似，都係好地道。佢嘅燒鰻魚時常有優惠，塊皮燒得超級脆! 燒蟹腳都好抵食，而松前棒壽司更係名物之一，鯖魚一D都唔腥仲好甜，嗰度仲有箱壽司，都幾特色。 點擊圖片放大 +5 10）伊藤位於鰂魚涌，中午主要做寫字樓生意，通常都full house, 佢嘅午餐的確幾抵食，呢個四色吞拿魚飯好特別，值得一試！ 11）壽司翔太又係一間高水準嘅餐廳，我係第一次喺嗰度食筋子壽司，超級香甜嘅魚子脹卜卜，非常好味！另外嗰度嘅魚生飯真係超級大碗同超級足料，魚生除咗舖面仲撈埋D飯，每啖飯都有大量唔同嘅魚生，正！ 12）吉利，呢間喺hku附近嘅日本餐廳，相信好多人都認識。我最鍾意嗰度嘅沖繩夜光貝，非常鮮甜再配埋個source, 冇得頂! 上次仲試過馬肉刺身，再搭多幾塊豐腴嘅馬背油，都幾好食，不過我都係鍾意食牛多D。另外一碟係河豚白子，即係河豚testes, 釀咗喺個柚子入面，無論texture同味道都怪怪地。不過個松葉蟹膏壽司就頂瓜瓜！ 點擊圖片放大 +2 13）鮨處光係一間門面非常唔起眼但名氣頗大嘅餐廳，當晩叫咗個omakase dinner set, 刺身有拖羅，好肥！天婦羅都好出色！仲有新鮮運到嘅左口魚刺身，好好食，左口魚邊油分比較多，味道亦較濃。最後嘅香蔥吞拿魚海膽玉子飯絕對係全晚嘅highlight, 海膽鮮甜，流心嘅玉子滲透落每啖呑拿魚同海膽之中，正到無語倫比！ 點擊圖片放大 +5 14）nobu係intercontinental 入面嘅日本餐廳，每次都係食omakase, 每道菜都非常出色。星期日嘅omakase相對平日抵食，好多種類選擇，分量都唔細。呢個whisky cappuccino 係一個充滿層次同驚喜嘅甜品, 一杯裡面有crunchy coffee crumble, coffee cacao, coffee creme brulee, milk ice cream and Yamazaki whisky foam, 值得一試！ 點擊圖片放大 +5 15）蟹膳係一間專食蟹嘅地方，店裏面自己養著一大缸蟹，保證新鮮。午餐價錢相宜，一個set有燒蟹天婦羅蟹粥炒飯等，佢嘅蛋黃天婦羅炸完之後仲係流心嘅，味道一流！最可惜就係個set冇刺身食。
