其實呢篇已經係11年嘅事，但最近同언니講返起，佢就話咁特別嘅經歷一定要記低佢， 即刻搵返當時嘅記憶出黎... 2011.11.19 - 20 話說呢次我去韓國2D1N 真係夠晒癲，半夜點幾機，去到韓國係當地時間5:30am 基於堅係人生路不熟加之前唔夠時間去準備，所以我Book咗pick up service， 走嘅時候送埋我去機場，咁我就完全唔洗煩交通嘅問題(諗住..) 點知呢2D1N最驚心動魄嘅，就係回程去機場嘅時候...... 回程係搭20:20機，約咗民宿主人18:00 響明洞接我，佢話明洞入到機場大概一個鐘左右， 所以本來時間係充足嘅，唔會太遲又唔洗太早到，點知... 夠鐘佢都未出現， 唯有喪打比佢，越等就越淆底同心急，最後佢遲咗成半粒鐘先到，上車都差唔多18:30。 好啦，上咗車諗住可以鬆一口氣啦，點知駛到去弘大(好似係)附近開始塞下行下咁喎， 心諗："唔係我趕飛機嘅時候先黎塞車呀？" 塞咗一陣上咗高速諗住放心啦，實趕得切， 咁韓國人普遍揸車都有用GPS嘅，咁我就一路望住佢個GPS，因為我驚佢行錯路， 雖然唔識路但係覺得唔對路都可以問吖。 好啦，響高速度過咗一個分岔路之後，佢個表情有啲奇怪咁望住個GPS， 我心諗："你唔係行錯路呀？真係打人架。" 之後佢同我講："好彩頭先個分岔路無轉彎，唔係你就去唔到機場架啦。" (=.=") 我即刻響個腦裡面出晒啲XYZ，呢個時候唔好講笑啦 ."/. 卒之19:40 左右先去到仁川機場，同佢Bye Bye之後就即刻仆去check in 以下係當時對話，但事隔太耐可能有啲亂 (地：地勤小姐；Ｓ：我) 地："請問你嘅目的地係邊？" Ｓ："Hong Kong" 地："Hong Kong?" (響度篤篤篤禁電腦) "It's too late!!" Ｓ："What? Too late? 어떡해?" 地："係，過咗check in 時間，已經唔可以寄行李" Ｓ："咁我hand carry上機得唔得？" (20吋喼) (地勤小姐再篤完一輪電腦之後) 地："你確定行李入面無超過100ml 嘅液體同危險品？" Ｓ："Yes." (後尾先醒起個喼入面有3盒Nature Republic嘅蘆薈啫喱，每盒都過100ml) 地："呢班機剩返一個位，係緊急出口嘅位，你有無問題？" Ｓ："No problem!!" (理佢咩位，上到機就得) (搞緊check in 手續期間) 地："呀，仲可以幫你寄行李，你件行李洗唔洗寄艙？" Ｓ："好呀！" (死人都寄，唔係嘥晒啲蘆薈啫喱) Ｓ："請問個登機閘口遠唔遠？" 地："好遠" (滴汗OS：仲要9秒9...) 當寄好行李拎咗Boarding Pass之後先叫做鬆咗"半"口氣 (剩返半口係因為仲未上到飛機)， 呢個時候我先發覺，平時對英文極到缺乏自信嘅我，竟然同地勤小姐對答如流， 都不得不佩服自己嘅應變 xDD 同地勤小姐Say Thank you之後就即刻行入去海關排隊，得兩個counter做嘢， 兩條隊都有十幾人排緊，諗住應該好快姐，點知唔記得咗韓國人做嘢係"姿油"啲嘅， 五分鐘、十分鐘條隊都好似無郁過咁，望下隻錶已經過咗20:00，我班機就黎閂閘， 地勤小姐仲同我講話個閘口好遠，條隊再唔郁就真係趕唔切， 呢個時候即刻捉住路過嘅海關小姐，同佢講："我班機就黎飛，點算？" (其實係想睇下佢會唔會可以叫啲同事快手啲) 海關小姐望完我張登機證同我講："Enough! Enough!" 跟住就走咗... 但好神奇地響我問完之後條隊終於郁啦，好快就輪到我，搞掂之後即刻飛奔去閘口， 水牌指示我嘅閘口係右邊，再行前啲轉左就係一排登機閘口，咁我就即刻跑過去， 行到路口準備搵定個閘口然後爆衝過去，當我以為要跑10幾20個閘口嘅時候， 原來我個閘口就係右排頭二三個左右... 當我跑到閘口嘅時候已經差唔多上晒人，我係最後一個上機。 去到閘口就係得返前面呢幾位香港朋友 上到機之後我先真正咁鬆一口氣，抖咗一個好大嘅氣，成件事真係好驚險！ 當我放好個袋仍然抖緊大氣以為我攰到嘔茄嘅身體同精神可以休息嘅時候... 空姐走埋黎用英文同我講咗一大串嘢， 但係因為佢嘅英文極重韓國口音兼我當時魂不附體嘅狀態下，我一個字都聽唔明？ 我因為聽唔明佢講乜，所以一直只可以講"Sorry, I don't know." 隔離位嘅아저씨(大叔)一路望住我地兩個對話，但我相信佢幫唔到手， 因為佢真係一個韓國嘅아저씨，後尾響一輪指手畫腳兼我魂魄歸位之下， 終於知道空姐想講乜啦，原來係話我個位因為係緊急出口，要睇熟果張緊急求生圖， Touch wood有啲咩事起上黎要協助空服人員。 一輪折騰之後，終於都順利咁返番香港。 P.S : 經過呢一次先真正發現，自己去旅行的話，之前唔做足準備係一件幾咁瘋狂嘅事。 自由行係可以隨遇而安，但交通呢方面係一定要有提前嘅準備， 同埋，千祈唔好好似我預到咁忟先去到機場，過咗Check in時間地勤小姐唔一定幫你， 所以我都好多謝呢次幫我嘅地勤小姐，감사합니다!!
