DAY2 22/5/2019 第二朝, 先去樓下食個早餐先, 普通的早餐但個面包真係好軟熟, 好香, 好好食! 第一站先去勤美誠品, 其實台中俾我既感覺舒服過台北, 因為地方大d, 人又少d, 空氣都清新d 勤美誠品其實就係一個商場(裡面有得食有得買,文青野比較多)+一條大道+一片草地, 老實講都幾舒服, 可能因為我去果兩日都唔熱, 5月尾, 23-24度, 又有風 之後就去左審計新村, 勤美誠品行過去10分鐘就到~聽講係台灣軍人住既地方, 之後就活化左, 改建為文創聚落, 有café, 有小店, 係打卡勝地,影相都幾靚, 不過我覺得黃昏影會靚d 點擊圖片放大 本來想食café既, 但有人死都話要食台灣讀書既朋友介紹既咖哩飯, 試左咖哩可樂餅同招牌咖哩芝士漢堡, 又真係幾好食, 滿滿咖哩汁, 加上濃濃芝士味, 紮實既漢堡, 真係隱世小店 (之後上網搵返, 原來都幾多人介紹, 去開既真係要試試) 店名:異鄉人咖哩日本食堂 電話:04-23019273 地址:台中市西區向上北路165號 食飽梗係要飲杯珍珠奶茶, 返去勤美誠品內既春水堂, 號稱珍珠奶茶發源地, 我地仲叫左兩樣小食, 伴面同烏龍鴨血糕, 珍珠奶茶就係以前細個飲果d珍珠+台式奶茶, 比起而家既台式奶茶, 少左果陣creamy口感, 不過就無咁”漏”, 伴面好驚喜, 惹味之餘好足料, 至於烏龍鴨血糕…只能說, 我麻麻地鴨血糕, 所以食左一件就encore no more了 點擊圖片放大 +2 食飽就行左去台中好有名既二手書店, 其實佢唔只刈書賣咁簡單, 仲有舊CD, 黑膠唱片, 連遠古錄音帶都有, 勁! 茉莉二手書店創始於1980年代，舒適寧靜又寬敞既空間令佢成為熱門尋找二手書的地方, 入面既環境真係好舒服。 地址：台中市西區公益路161號 營業時間： 12:00–22:00 電話： (04)2305-0288 之後就搭巴士去一中商圈, 呢度俾我感覺算係台中最熱鬧既地方, 就好似香港既旺角, 通街都係人, 我就當然要行下光南大批發啦, 又平又多野買, 仲要平過香港多多聲, 面膜我就無買啦, 不過就買左幾支專科洗面, 香港要件59.9一支, 呢度188台幣2支, 即係24一支, 仲有平勁多既暗瘡貼, 一個字: 掃!!!!! 去到必去既中友百貨, 最大特色係佢每層既洗手間都不一樣, 而且女士洗手間仲有好大地方俾係照鏡補妝, 真係好貼心~ 去旅行不是食就行, 一中夜市又是一個必去地方, 可惜無端端落大雨, 買左杯野飲就要撤退… 唯有返去中友百貨食一間叫”花月圓” 既日本拉面, 點知又真係幾好食, 湯底夠曬濃, 我忍不住飲左一大碗, 正! 再去左樓上好靚既誠品打個卡! 謝謝觀看以上文章，期待下次繼續與大家分享 ❤ 歡迎邀約合作試用 出席活動 ❤ Email : fungnata@gmail.com Facebook : https://www.facebook.com/nata.fung.16 Instagram : https://www.instagram.com/fungnata/
