疫情之後，第一次去東京，當然又期待又興奮啦~不過話曬都唔係第一次去東京啦，所以今次會去啲新景點，為大家發掘更多唔同面貌嘅日本!!!豐洲の浸沉式藝術體驗豐洲teamLab Planets TOKYO原定係2020年秋季就完結，不過因為人氣高企而延期至2023年秋季先完結，所以我就有幸可以係佢結束之前，親臨展覽。 展館最近嘅車站係海鷗線「新豐洲站」，一落車已經可以見到大大個teamlabs logo，由車站行幾分鐘就到啦。介紹番teamLab Planets TOKYO先，呢個係一個藝術同科技嘅結合，比遊客一個沉浸式體驗，所以成個展覽都充滿好多令人驚嘆嘅互動藝術裝置。展覽一共分為「Water Area」、「Garden Area」、「Public Area」三區。 《無窮無盡的水晶宇宙》相信唔需要我多介紹，大家都一定係社交平台見過啲朋友、KOL係入面打卡嘅相同影片啦。親眼睇到同一個空間內閃爍嘅燈光不斷變換顏色，色彩綿延變換，真係幾壯觀架!不過空間有限，所以入面有好多人，好難可以係入面影到靚相打卡><我想特別介紹《漂浮於落花世界》，網上比較少人提及過呢個展區，我私心推介大家可以留10-15分鐘時間，瞓係展區內地上仰望天花嘅投影。因為佢嘅投影真係會不斷轉變，而且投影出嘅影像仲會縱橫交錯重疊而有多種效果，再配合唔同嘅背景音樂，真係點睇都唔會厭架。 溫馨提示: 如果大家一早Plan好旅行嘅日子就要盡早去網上買飛啦，因為佢每日都會有設time slot限制入場人數架，而且好嘅time slot好早就已經比人預訂咗，所以真係要趁早預訂呀!!!橫濱の高達迷一日深度遊位於橫濱嘅限定Gundam Factory，原定展期到 2023年的3月就完結，好彩官方宣佈展期將延長一年。Gundam Factory Yokohama（高達工廠）絕對係高達迷必去嘅朝勝地方。一入場就會見到一個1:1嘅高達模型—GUNDAM-DOCK，成個高達嘅關節都會轉動，令高達嘅手腳可以做出多個唔同嘅動作，例如行路同跪低，效果非常逼真!!! P.S. GUNDAM-DOCK嘅演出時間會隨季節改變，大家入場前記得要留意時間表，唔好錯過呀!!!除咗睇高達機器人嘅展示，遊客還可以去「GUNDAM-LAB」深入了解高達機器人嘅內部結構。當中，更設有AR的體驗區域比大家體驗各種技術令大家可以更深入地了解高達嘅世界。場內仲有GUNDAM Café YOKOHAMA Satellite同埋美食車，唔怕睇得太耐，而冇野食呀xd 最後當然唔少得shopping時間啦~ THE GUNDAM BASE YOKOHAMA Satellite販售許多與橫濱合作嘅商品、店內好多商品都係獨家商品黎，尤其係高達模型，唔同尺寸都應有盡有，高達迷記得要預先做定功課去掃貨呀!!!其實疫情過後嘅東京真係多咗好多新旅行景點，我都唔可以係一個旅行去曬呀><如果大家都有新景點想分享嘅話，歡迎大家係下面留言，一齊討論下啦~~~
