由於濟州既景點分得比較散... 一個人去而又唔識揸車，最好都係報Day Bus Tour (可以選擇坐公車去各景點，但每班車時間要一小時，去到既地方就會較少) Day Bus Tour主要分東西兩線 逢雙數日就西線，單數日就東線 每條線既收費都係69000韓元(包晒入場票同午餐)，相當抵玩架!! 以下係西部路線景點(不跟次序) Daybustour – west course 1. Mysterious Road 神秘道路 2. Tea Park 噢! 雪綠茶博物館 3. Lunch – Korean buffet 4. Spirited Garden 思索之苑 5. 3D Museum OR Teddy Bear Museum 6. Yongmeori Coast 龍頭海岸 (or Mt.songak 松岳山) 7. Glass Castle 玻璃之城 8. Cheonjeyeon Water Fall 天帝淵瀑布 大概早上八九點就會有小型旅吧黎門口接你 當接晒所有旅客就可以正式出發喇~!! 第一站係神秘道路 所謂既神秘，其實就係明明上坡，但車子會走下坡 當你以為走緊下坡時，車子就會溜後.... 第二站就係 噢! 雪綠茶博物館 係度可以了解下綠茶文化同埋買到唔少產品 最唔少得既，係一定要試佢既綠茶雪糕同綠茶蛋糕，非常正架!! 時間夠既話，可以去埋旁邊既innisfree體驗小屋 裡面主要畀大家DIY香皂，仲有精油同小部份產品賣 但最最最吸引既係佢既CAFE!!!! 好可惜囉，因趕時間試唔到....但聽聞其他試過既人都讚不絕口 下一站，係玻璃之城 裡面樣樣野都係用玻璃造架... 一入門口就見到，超級靚....好難相信真係玻璃... 呢度就連一草一木都係玻璃黎架~!!! 再去就係思索之苑 午餐係呢度食，都係一般韓式自助餐，所以唔講喇...先等我介紹下呢度啦~ 呢個公園以盆景為主，聞說某中國領導相當中意呢個地方架 可能大家會覺得好悶，睇盆景....但如果多花心機，會影到唔少靚相 唔講咁多，去相畀大家睇啦~!! (小妹影相都係初學階段，請指教，哈哈!) 點擊圖片放大 當然相唔只咁少，只敢放幾張見得人既... 但咁樣影下影下，我一個人都行左成粒鐘呀....哈哈哈.... 再黎係泰迪熊博物館 裡面有好多好多Teddy Bear架~其中韓劇"宮"裡面既Bear Bear為係晒度!! 係度玩包你反老還童...哈哈~ 如果天氣好，導遊會帶你去龍頭海岸，否則先去松岳山 當然，我個日天氣超好，水位又低，可以去龍頭海岸玩啦~! 沿岸其實都有唔少海女捉返黎既海鮮 當地人會就咁坐係岩邊食最最最新鮮既剌身架!!! 本來我都好想試，但怕自己怕吞吞爬唔切海岸回去上車，唯有含淚告別... 其實三月份應該係櫻花盛開既季節，但家下早左黎，櫻花完全未開... 好彩都有一大片油菜花安慰下我~ 最後係去天帝淵瀑布 其實雨水呢個時候較少，所以三條都係得一條比較大D 相信大家覺得條瀑布好細下，冇辦法啦...再加上我比較矮，影唔到幾多... 完左Daybustour，我請司機哥哥係東門水產市場放低我 網上有人介紹過，有間超好味刺身屋係附近，所以點都要試試 用GPS摸摸下就搵到，真係超級多人 而且，周圍都掛左電視訪問既海報，望下都知好食!!!! 其中一個叔叔走黎問我要咩，望下餐牌，原來小份(2-3人)要30000韓元 叔叔知我得一個人，居然話半價售一人份畀我，好感動呀~!!!! 呢個，就係一人份剌身... 淨係伴菜都嚇死係，居然有燒秋都魚同生蠔 刺身唔使講，新鮮到不得了 魚肉厚切，又甜又彈牙...黎濟州，點可以唔試? (所以我連續幫襯左兩日，哈哈) 食飽飽之後又係時候返去抖抖 第二日係東部線
