早排玩埋麥徑嘅「自然步道集章挑戰」，終於收到換領Email．就趁星期一放工去油麻地Reecho換埋個章。順便喺附近食埋野，想食得清啖啲，就揀咗旺角洗衣街嘅「無肉食」素食自助餐 餐廳環境乾淨企理，冷氣夠凍，座位都幾多，不過枱同枱之間有啲逼，個晚食都要搭枱。職員態度正常，食物 refill 速度都幾快。入店前喺前台俾錢，之後自己搵位，過程算快，不過要記得自己收碗碟。 食物種類都幾豐富，有沙律、熱食、水果、甜品、湯同飲品等等。味道唔錯，唔會太油膩或者太鹹。雖然款式變化唔算好大，但勝在味道好，例如泰式素生菜包、薑醋蛋、炒芥菜、蒸南瓜仔、粟米牛油果沙律等等都值得一試。飲品方面，熱薑茶唔太甜，仲有檸檬水同花茶。我今次係平日晚上七點半去食晚餐，雖然係平日，但都差唔多坐滿。食物擺放喺中間，無論坐邊張枱都方便拎嘢食。 平日晚餐 $138，而且無加一，價錢都幾合理。
