觀賞富士山係呢次去東京旅行嘅重點行程！好感恩當日天氣好好 (不過都係超凍，只有攝氏2-3度)，可以好清晰咁觀賞到富士山。妹豬仔同男朋友本身係想去一間人氣蕎麥麵店食午餐，點知嗰日休息冇開，於是我哋轉去附近呢間文青cafe！ 點擊圖片放大 呢間cafe其實係間麵包店嚟㗎～客人可以直接買走麵包，又或者喺店舖內邊嘅cafe用餐。一入店舖嘅門口位置係購買區，擺放咗唔同款式嘅麵包，亦有果醬(定係醬料)、香料等等。 點擊圖片放大 客人自己揀選好麵包之後，可以到收銀處付錢，如果怕就咁食麵包會好dry，亦可以喺付錢時同店員講加點飲品/湯品。 我哋當然選擇喺店內用餐～付錢之後店員就俾咗個號碼牌我哋，方便店員送餐記認之用 (麵包造型嘅號碼牌真係好得意！)，之後就可以行入内邊cafe自己搵位坐。 ◆ [麵包x3個] (¥280, ¥300, ¥330) ◆ [法包x2片] (免費) ◆ [Cappuccino x2杯] (每杯¥500) 麵包烘熱同切好之後，店員就連同兩杯咖啡一齊呈上。呢度嘅麵包係用自家製嘅天然酵母製成，經過烘熱之後，麵包外邊香脆而内裡鬆軟，超級好食！咖啡方面就正正常常冇咩特別。 點擊圖片放大 +2 除咗美味鬆軟嘅麵包之外，呢度嘅「裝潢」同「風景」係非常值得一提！ 店舖以白色為主調，攞放咗唔同嘅可愛裝飾、小擺設～ Cafe更有幾個送滿書本嘅書櫃，等待餐品途中，可以好似文青咁睇下書 (不過首先要識日文至得)。 如果你同妹豬仔一樣咁無聊嘅話，仲可以企起身望入廚房睇睇整麵包添～ 好！最最最重點嚟喇～就係...富士山美景！店舖除咗店内cafe之外，亦有戶外用餐區，而且兩個地方都可以觀賞到富士山。因為當日太凍，所以我哋揀咗坐喺室内，食完麵包之後再出去欣賞呢個靚景！ ◤妹豬仔◢：整體嚟講，呢度環境舒適，感覺就好似去咗個小秘境咁～同埋可以一次過享受到美景同美食，非常滿足！ ○○○○○ レイクベイク (Lake Bake Cafe) 山梨県南都留郡富士河口湖町大石2585-85 ○○○○○ *本網誌文章純屬個人意見或經驗分享，僅供參考～♥ 歡迎試食/產品推薦/合作機會，請聯絡： Email: muichujaifoodie523@gmail.com ↓↓↓ 即刻Like & Follow「妹豬仔」其他channel ↓↓↓ Muichu.jai： Instagram | Facebook | OpenRice | 大眾點評
