早排睇《二月廿九》見到Ryan為咗Yeesa不斷鑽研去整好食嘅玉子燒，搞到妹豬仔囉囉攣都想食，於是妹豬仔就同朋友去咗呢間日式食堂嚕～環境好舒服，入座之後，店員就遞上tablet等我哋自行點餐，真係夠晒方便！ ◆ [心之蛋卷] (HK$88) 話明一心嚟食玉子燒，當然要點玉子燒啦～蛋面有沙律醬同茄汁做裝飾，仲畫上咗「♡の」字樣，真係好有心思呀！ 蛋煮得啱啱好，唔會太生或太熟。內裡就有蟹籽、三文魚同流心嘅芝士，切開嘅時候，啲芝士就已經準備流出嚟咁，超邪惡呀！ ◆ [心之魚生飯] (HK$98) 呢個係一個拼砌成心型嘅魚生飯，飯有三文魚粒、吞拿魚粒、油甘魚粒、蟹籽、青瓜片，面頭仲有隻甜蝦，再撒上芝麻，整個魚生飯賣相好吸引，突顯廚師嘅用心製作！而且啲魚生粒新鮮，整體味道唔錯唔錯！ 我哋仲點咗兩款蟹籽杯 (哈哈! 好似飲酒碰杯咁)，Cheers！ 點擊圖片放大 ◆ [海膽蟹籽杯] (HK$68) 海膽味道鮮甜，開頭以為只係得海膽同蟹籽，點知原來底下係有壽司飯㗎～賣相好靚，可以話係視覺享受，用嚟打卡就啱晒！ ◆ [帆立貝蟹籽杯] (HK$68) 面頭有4粒帆立貝，粒粒都又大又鮮甜，同 [海膽蟹籽杯]一樣底下係有壽司飯。賣相好好，超IGable！ 另外，我哋仲點咗啲會「jaja聲」嘅嘢食，快啲睇下啦！ ◆ [原條鰻魚石鍋飯] (HK$118) 鰻魚飯用石鍋盛住，夠晒熱辣辣，仲會聽到jaja聲添呀！原條鰻魚大條得嚟好肥美，加埋燒汁好好味。飯嘅份量比較多，所以建議2-3人share嚟食，另外如果有更多飯焦會更加好～ ◆ [石板黑松露牛油帶子] (HK$88) 一份有4粒帶子，經廚師用牛油煎香之後，再放上黑松露，最後以熱石板呈上。 聽到嘅jaja聲更大，而且仲會見到冒煙，比[原條鰻魚石鍋飯]更熱辣辣。帶子好大粒、好肥美，粒粒都脹卜卜咁，而且味道鮮甜。 ◤妹豬仔◢：整體食物水準同賣相，以及環境都好好，值得推介！ 點擊圖片放大 +2 ○○○○○ 心之食堂 (Love Cafe) 地址：銅鑼灣耀華街3號百樂中心12樓1203室 ○○○○○ *本網誌文章純屬個人意見或經驗分享，僅供參考～♥ 歡迎試食/產品推薦/合作機會，請聯絡： Email: muichujaifoodie523@gmail.com ↓↓↓ 即刻Like & Follow「妹豬仔」其他channel ↓↓↓ Muichu.jai： Instagram | Facebook | OpenRice | 大眾點評
