包先生話想送份禮物俾佢另一位「愛人」，仲叫我幫手...... 大家係咪以為我會好嬲?！ No la……我仲幫佢親手炮製呢份禮物添！！ 傻的嗎? 當然唔係啦…因為呢位係另一位包太、包先生的媽媽~ 奶奶生日，所以我為佢炮製咗可愛嘅壽桃包。 我決定挑戰難度，蓮蓉都係自家製，將蓮子煮腍、攪拌，然後加糖再煮。(如果唔想自己整，烘焙店都可以買到蓮蓉饀) 今次用咗金像牌多用途麵粉，做好麵糰加入饀料再搓成飽滿嘅桃子形狀(這個步驟可看附上嘅參考影片) ，最後仲要上色。 製作步驟都幾繁複，不過包先生都包媽媽見到咁可愛嘅小壽桃都好開心，大讚我呢位包太太，係值得嘅！！ 提提大家，呢個賀壽用嘅係叫壽桃包或壽桃，千祈唔叫錯壽包！**上網查一查就知道兩者分別好大，唔好搞錯呀！ 食譜：(資料來源：美味食譜-由玲開始) 蓮蓉餡材料 白蓮子 200g 水 800g 粗粒砂糖 180g 花生油 110g 麥芽糖 30g 桃包材料 (8個份量) 中筋粉 150g 砂糖 18g 酵母 2g 牛奶 78g 粟米油 3g 蓮蓉餡 160g 鹹蛋黃 2隻 紅麴粉 1g 滾水 10g 蓮蓉餡做法 蓮子(不用浸)洗淨加入水煮滾後轉小火煮10分鐘,熄火焗20分鐘, 再開火煮10分鐘，熄火焗20分鐘至稔身 倒入高速攪拌機打1分鐘至幼滑(我的高速攪拌機是1600w,如果用普通攪拌機要打耐啲) 易潔鑊加入油再倒入蓮蓉中火炒至完全混合，再加入砂糖、麥 芽糖炒至挺身(全程約25分鐘左右) 蓋保鮮紙待涼後放入雪櫃雪過夜備用 桃包做法 牛奶加入酵母攪溶 麵粉、砂糖混合,加入牛奶酵母混合物及粟米油搓成光滑麵糰, 靜置鬆弛5分鐘 蓮蓉餡分成8等份每份20g,鹹蛋黃1開4包入蓮蓉餡中搓圓備用 把麵糰分成8等份,每份約30g左右搓圓 把小麵糰壓成中間厚邊薄麵皮,包入餡料,收口向下放入包底紙, 把包的頂部收尖成桃形 醒發20分鐘(如冬天要發耐少少) 冰水落鑊一齊蒸15分鐘(大火),打開少少蓋疏氣5分鐘才取出 趁熱用膠刮從底部向上壓出桃紋 紅麴粉用滾水攪溶 用牙刷蘸上紅麴液彈落桃包有直紋之頂部作裝飾 參考食譜： 包餡及造型參考影片(資料來源：Carol 自在生活)
