日本嘢食得多，標明有素食嘅日本餐廳真係買少見少，今次我去咗蘭桂坊嘅日本餐廳，去感受一下喺美酒美人美景包圍下嘅日本菜係點樣。 餐廳設計、燈光、感覺、待應都好Chill （唔係凍呀），好有蘭桂坊特色。菜式選擇多，食肉嘅朋友一定會食得好高興；食素嘅朋友都唔使失望，有足一頁紙嘅食物畀你揀，其實都算好唔錯。 點擊圖片放大 講食物前，我想講，成餐飯我食得非常迷惘，因為我明明嚟食日本菜，但環境似美國餐廳，待應似酒吧、食物似中菜‼‼ 係呀，係中菜呀‼ 個炸豆腐沙津係薑蔥油味，平時點雞嗰啲薑蔥油呀‼ 椰菜花天婦羅係糖醋咕嚕肉味，口感同味道都似足糖醋咕嚕肉‼ 炒日本烏冬係炒沙河粉咁款‼‼ 味道、質感、鑊氣，連條粉都係沙河粉咁呀‼ 我食到最後呢道菜先醒覺，呢種違和感，原來係因為我以為自己食緊日本菜，但其實係食緊中菜‼ 我一言驚醒洛克人，朋友聽到之後都即時放下心頭大石，大家去到最後一道菜終於釋懷，感受到呢餐飯嘅美好。 講番食物，由沙津、壽司、燒物、天婦羅、烏冬我都叫齊，朋友仲點咗銀雪魚西京燒，佢話油脂夠，不過味道偏鹹，同埋現場太黑，睇唔到啲魚骨，最後要深情而專注地摸黑噒骨（天黑之後間餐廳就好有氣氛）。 炸豆腐沙律（第一道中菜）：佢唔似平日食開嘅日式炸豆腐，佢似普通炸豆腐，味道唔係日式醬油味，係薑·蔥·油·味。驚喜喱～ 值得一讚係，舊豆腐好滑好有豆味。 枝豆卷：好食！枝豆遂粒上漿炸到脆卜卜，口感同味道都滿分。 點擊圖片放大 雜菜天婦羅：正常雜菜，但部份未熟，同一片蕃薯，一半熟一半唔熟；另外天婦羅漿一般，夠薄但唔脆，嚟到已經有啲淋；點天婦羅嘅醬油好淡，同埋其實食雜菜天婦羅最好配鹽，如果可以畀到岩鹽、抹茶鹽或者咖喱鹽，是但一款鹽都贏哂喇。 燒銀杏：落鹽太重手（留啲畀樓上咪好囉）。 椰菜花天婦羅（第二道中菜）：喂呀！呢個係天婦羅⁈ 唔好啦……佢係咕嚕椰菜花呀。你個汁做得咁好食，芝麻夠香又夠多，唔好再叫自己做天婦羅啦，你承認你真正嘅身份，係咕嚕椰菜花啦，大家都一樣會咁鍾意你㗎！ 雜菜炒名古屋烏冬（第三道中菜）：當呢砵烏冬送到嚟時，我同朋友都呆咗，我哋無諗過名古屋烏冬係咁，因為名古屋嘅烏冬唔係咁，就算話係白布烏冬都唔係咁；相反，如果你話佢係名古屋棊子麵，我都仲可以稍為聯想到。Any肥，雖然樣子同身份有待認證，但係放入口就發現佢好好食，蒜香十足，好有鑊氣！調味亦係中式常見又親切嘅乾炒牛河咁味。真心，係好食嘅，只要唔好諗佢係烏冬，當佢沙河粉就得喇。 我望住出面嘅無敵夜景，叉起條沙河粉，我終於諗起……呢間餐廳就好似英國嘅迴轉壽司連鎖店Yo！Sushi 咁，當地人警告過我千祈唔好去食，因為唔係畀我哋亞洲人食，口味係啱外國人。所以呢間餐廳嘅食物係好食嘅，只係因為我哋食慣日本味，所以先會有種食緊Fusion菜嘅感覺（唔係超市呀）。另外非常值得一讚係，待應非常友善貼心，每次只上兩道菜，差不多食完先再上菜，而且每位都好有禮貌。整體而言，成餐飯都食得舒服又開心，只要明白大家文化上嘅差異，其實一切都很完美～ 一下覺醒，我即時好欣賞個廚，明明做中廚可能更出色，或者……佢第時轉去做中式fusion菜更有得諗，佢煮嘅咕嚕椰菜花，個汁確實好好食，不過唔好再叫自己做天婦羅喇，外國人去到日本點真正嘅天婦羅時，就輪到佢哋好迷惘喇。 餐廳：Kyoto Joe 地址：中環 蘭桂坊 德己立街30-36號 加州大廈23樓 網址：https://kyotojoe.com/ 吃素有益身心，但要吃得有智慧。希望透過這專欄，讓更多人能做出營養滿分又簡單的素菜，令肉食家庭的餐桌都能出現更多素菜菜式。個人專頁：宮保・素・雞丁。 ✨✨ 有關工作邀請／合作，歡迎隨時接洽 ✨✨
