珺,美玉也~ 能夠為自己間餐廳起個咁靚嘅名,我都期待佢嘅食物會如玉般優美高質,而答案係:局部性地區有美感,部份如雷般攻擊我嘅牙齒,間中火熱滴汗,時晴時雨,但整體而言係好嘅。 位於中環蘭桂坊附近嘅純素中式fusion餐廳,標榜無蛋奶,無五辛,對素食者而言未食已經流哂口水非常吸引,而事實上佢都係幾難book 位嘅,當日我都係book到5:30pm,來個非常早嘅晚餐。 環境舒適,食物選擇豐富,既有常規餐牌,亦有季節限定同各類套餐,而飲品選擇方面亦非常豐富(無酒精),今次我就揀咗黑白啤~ 其實所謂黑白啤,亦即係黑麥汁同白麥汁。落order時待應姐姐好好人,仲教我地要1:1咁溝就最似啤酒,於是我同朋友照做,效果係……好似淨飲仲正,白色甜啲,黑色麥啲,之後仲叫多支黑麥汁飲多個round。點擊圖片放大 先來一個前菜-水晶粉撈素翅配芝麻柚子醬。爽、彈、滑!最出色係個柚子醬,非常清新,唔係用韓國柚子醬溝出嚟嘅hea嘢,感謝。 再來一個季節限定-芙蓉卷配冬蔭醬。其實係腐竹球,味道溫和不辣,仲加咗番茄同金菇 ,食落舒服滋味無窮。可惜……佢明明寫住係有紫菜/昆布/海帶/海藻/綠色海草類植物(Crispy Bean-curd seaweed roll),但食完都唔發現有一條紫菜毛,所以……有啲失望。 然後係佢嘅招牌菜-玫瑰叉燒。好可怕……我咬到牙都軟埋先食到一件,點解呢?其實呢件叉燒我喺另一間素私房菜都食過,當時對方因為一早整定凍咗,所以重新加熱但又過咗火,結果舊叉燒(其實係豆製品)就柴過腳皮,硬過碌棍,但有後聞;當時嗰間餐廳見我哋食得好痛苦,一問之後先知舊叉燒柴咗,所以即時畀過一碟新嘅我,咁我先知原來舊叉燒係又熱又軟又好味。嗰次食完真係一世陰影,點知今次又嚟一次!起初我以為係呢間餐廳嘅特色,但當我同朋友用生命咬埋最後3件時,隔離枱碟玫瑰叉燒就上桌喇,然後…… 我見到佢碟叉燒好靚仔,圓潤有光澤,夾落有彈性,一睇就知唔係死實實,佢哋食起嚟亦無出盡飲奶力;我同朋友對望(上次都係佢同我食),我哋就知舊叉燒咩料喇。 最後嚟個碳水化合物-XO醬牛肝菌炆新竹米粉(少辣)。少辣都已經夠辣,辣到我哋要再叫多支黑麥汁甜一甜佢。至於味道……無咩印象,不過不失。 雖然佢舊玫瑰叉燒令我以後都唔想再食素叉燒(我自覺無緣),不過其他各樣都唔錯嘅,最重要係待應姐姐好好人,多謝哂~ Venue:珺Address:中環 威靈頓街2-8號 威靈頓廣場M88 6樓Facebook:https://www.facebook.com/EmeraldvegetarianFacebook Page: 宮保・素・雞丁