要用沉重嘅心情講拜拜……講緊嘅係位於中環士丹利街嘅素食餐廳 VeggieSF，默默努力咗11年後將於今年秋天結業。佢簡直係人生必試嘅純素餐廳之一，無他嘅，食物正，款式多，夠大份，裝修精，地點好。我去過無數咁多次，每次帶食肉嘅朋友去，對方都會讚不絕口，話好食之餘，完全唔似素／齋。個老闆仲好有heart，你落單時會同你解釋餐廳理念係不傷害動物，所以除咗係食素，就連牛奶、蜂蜜都唔會用；如果有宗教信仰，仲可以幫你走五辛。哇……中環喎，平時落完單仲唔雞咁腳走去做第二枱客咩，仲邊會咁得閒同你講理念⁈ 所以話，好食嘅唔止係食物，仲有「用・心」。喺講拜拜之前，等我講吓佢有咩好食先，等未食過嘅朋友仔可以把握機會去試吓，第時無機會再食到㗎喇。不過真心唔好意思，我每次都係好猴急咁食哂啲嘢，加上去咗太多次，所以無影到咁多相。大家要睇相就去佢專頁啦～餐廳係以五十年代嘅三藩市作為主題，上到去由門口到枱墊都係懷舊玩具風，感覺唔突兀而係有趣嘅。食物種類上至burger、意粉、意大利飯，下至越南撈米、星州喇沙、印尼椰汁飯、海南雞飯，橫向仲有韓國炸雞、日式壽司卷、彩虹蛋糕；淨係burger 都有5款畀你揀，每次去到揀食咩都好頭痛。 不過真心推介我每次都encoure 嘅越式撈米粉（Oakland Breeze）。 食素但可以有魚露嘅味覺：勁！而且味道濃得嚟有層次，炸物香口熱辣，炸豆腐豆味濃，隻炸蝦啖啖爽口，但其實係豆製品，仲有佢夠多茜！！！喜歡荽茜嘅朋友應該會食得好開心。佢嘅burger 亦非常大份，非常飽肚，每次都爭d食唔哂，佢嘅醬汁好好味，入面有咩等你自己去發掘啦。 我每次都會點紅菜頭burger（I am Fabulous），因為我唔太食素肉／魚。講真，佢有缺點嘅，就係你好易食到成身都係，所以要好小心；同埋薯角炸得唔係好透，所以有時會覺得好油，或者轉轉心情當佢係煎薯角，感受會更好。 食物種類之多，美味程度不能盡錄，喺佢執之前，又去開中環時，不妨去一次，佢成日都會滿座，記得book位～Venue：VeggieSFAddress：中環 士丹利街11號 10樓Lunch Set：＄138＋Facebook：https://www.facebook.com/veggiesfFacebook Page: 宮保・素・雞丁
