你行街時會唔會偷聽人講嘢？我唔係專登偷聽，不過一有聲就會聽吓講咩。有次行過超市凍櫃，聽到兩位婆婆傾計。婆婆a：「我個囡呀，好鍾意食呢個呀……佢拎嚟撈麥皮，佢話好食喎。」婆婆b：「吓，咁樣好食咩？點食呀？」婆婆a：「我唔知呀，佢撈埋話好食囉，我無試過呀……」婆婆b：「呀……」（語調中滲出不安）聽完我望吓佢指嘅係咩……日本味噌！用味噌撈麥皮⁉ 於是我第二朝就亂咁撈嚟食喇。好好食喎！！！ 呢個配搭係我自創嘅，大家可以依個人喜好加入食材。不妨試吓，未食時會驚恐，一食為之震撼，以後我都係整呢款鹹麥皮食，有啲似鹹粥，正架。 食材（1人份）：即沖麥皮 4湯匙原糖 ¼茶匙鹽昆布 ½茶匙綜合味噌 1茶匙熱水 適量做法：1）將材料放進碗中，水煮開立即倒進去，水量以個人喜歡的濃稠度而定。2）拌勻後放置3分鐘即可食用。注意：1）用煮食用麥皮亦可，煮好關火後才加入味噌、原糖、鹽昆布，拌勻即可。2）放置3分鐘能讓麥皮吸收味噌，鹽昆布完全浸開。3）可省略鹽昆布，亦可以加入一般的即食紫菜碎，增添鮮味。 Facebook Page: 宮保・素・雞丁
