喜歡歎酒店下午茶嘅朋友,對於The Butterfly Room絕不陌生。座落六星級香港瑰麗酒店二樓嘅The Butterfly Room,係近年火熱酒店下午茶首選,大家必須提前2個月網上預約,而且經常喺短短5分鐘內全數滿額,我自己就連戰3個月都失敗,最後全靠一位下午茶達人好友嘅神速之手,終於搶位成功,促成今次呢個精美下午茶之約。The Butterfly Room嘅下午茶,肉食做得出色係人都知,但佢嘅素食鹹點(蛋奶素)更係一絕,優質到不輸朋友嘅常規 tea set。鹹點包括4款三文治及1款酥皮盒,全部都係迷你一口,但用料高質,非常滿足; 而甜點係無限refill,真係食到你唔食,不過大家記得睇住時間,環境同食物都好靚,小心掛住影相,食唔切呀。 1)黑松露三文治:平日食黑松露食到好悶,因為一般嘅黑松露味道霸道但平傭,但今次呢份黑松露三文治係有層次嘅!香味唔係gas味,而係優香嘅黑松露味,入口係有層次同深度,你食過就明㗎喇。 2)牛油果醬車厘茄多士:牛油果醬香滑,車厘茄有用香草橄欖油醃過,多士香脆、夠薄、唔乾,非常好。 3)茄子紅洋蔥三文治:茄子有口感,唔會淋哂,紅洋蔥有用紅酒醋醃過,酸味同鹹味平衡出色。 4)青豆撻:人人痛恨嘅青豆竟然擺在眼前……平時我一定唔食,但畀咗咁多錢點都要食咗佢。放入口咬一啖……好・好・食!!! 太驚喜,青豆飽滿,無豆青味,非常新鮮,咬落口唔會出水,撻餡料有黑松露味,跟青豆出奇地夾;就連同樣唔食青豆嘅朋友都大讚好味。 5)原片黑松露野菌酥:係,都係黑松露,但好食喎~ 佢啲菇脆口㗎,而且忌廉香濃又夠滑,酥皮又夠鬆化,反而片黑松露食完有啲痴牙(哈)。 6)無限 Scone(配新鮮果醬及Clotted Cream):一如既往嘅質感,無太大驚喜,暫時仍然覺得文華酒店做得更出色;不過值得一讚係佢嘅莓醬同柚子醬,濃香果味,非常清新。 7)無限甜品區(10款):佢有兩車甜品你可以無限refill,真係多到你食唔哂,亦食唔切。佢每樣甜品都會拎一件畀你,但肚仔空間有限,我個人推介Tahitian Vanilla Mille Feuille(大溪地雲呢拿拿破崙)。只要食一件就返唔到轉頭,拿破崙鬆化又夠香,亦唔會太乾,雲呢拿忌廉非常濃郁幼滑,甜度適中,極滑同極脆嘅口感同時出現。所以食完一件,我都即刻再refill 一件。如果可以時光倒流嘅話,我諗甜點我只會點呢件拿破崙食,其他都唔使喇(笑)。 經常有朋友問:「食素係咪無啖好食?」非也,非也,就以Afternoon Tea為例,只要預約時講明係素食人士,係咪食得蛋奶蔥蒜酒,酒店就會預早安排。基本上所有酒店預早通知都一定安排到,部份更能即場準備,而且大部份嘅食物都係水準之上,所以大家即管盡情邀約你嘅素友去 happy together。今次啲食物名係我改嘅,因為素食menu 通常都係無menu,所以無得影menu。通常去到佢畀咩我就食咩,有種食 omakase 嘅感覺(哈)。想知道轉素menu有咩食嘅朋友,請直接向酒店查詢。Venue:The Butterfly RoomAddress:尖沙咀梳士巴利道18號香港瑰麗酒店2樓Afternoon Tea:$898 +10% (2位用)Booking:Online Booking only