台中旅遊回來後依然有三天連假，由於要過海，決定到訪想試N年嘅餐廳，正是呢間位於西環石塘咀山道嘅「沒奶沒命」。中午時份到達，附近修路中，差啲令我錯過小店嘅門面。 全店只有十餘個位置，平日午飯時間爆滿，有上班族、亦有隻身用餐嘅人；令我感嘆港島區嘅消費力果然不一般。餐廳面積不大，開放式廚房，裝潢佈置玩味十足，雜而不亂。採用自助形式，先到收銀處點單，由店員送餐，再自行清理。 餐牌供應三文治、漢堡、全日早餐、炸魚薯條、班戟等簡餐，除左主打嘅奶昔，仲有朱古力、梳打等飲料，一律單點，即點即製。 點擊圖片放大 +3 黐線芝士黐住芝士治 $78 見過好多網上分享，正是推介呢款芝士治，顏值高，相機食先一流，見到實物都忍唔住哇一聲。三文治切半，可以清楚見到澎湃洶湧嘅芝士好似熔岩咁爆出黎。雖然我並唔鐘意用邪惡去形容食物，但當下我諗唔到其他更貼切嘅表達。 麵包加入紅菜頭製成吸睛嘅顏色，面頭加上芝士碎、香草，有適量厚度，邊位比較硬身，包身軟熟，襯芝士仲軟嘅時候快食，芝味濃郁，簡單美味。若擺放太耐，芝士開始凝固，包身又變硬，味道爭好遠。 和牛芝士漢堡包配薯條 $135 點左比較貴嘅款式，包身有外脆內軟嘅感覺，我地幾鐘意，漢堡當然係新鮮熱辣，夾有洋蔥、芝士、醬汁，肉質偏腍，咁樣嘅配搭確實係好食，但性價比唔高。薯條雖然係幼薯，但即時炸起，香脆度高 加埋味粉，好食！ 花生醬朱古力奶昔 $44/12oz 焦糖杏仁碎比利時酒奶昔 $54/12oz 點左兩款奶昔，分別有12oz同16oz，相差$14，點左細杯就算。花生醬朱古力香甜濃郁，飲飲下會有點膩；相對之下更推薦baileys，味道冇咁強烈，好香焦糖味，而且有杏仁碎，口感冇咁單調。奶昔入口濃稠，冰感唔高，十分滑溜，只係呢個價錢咁細杯，會有啲肉赤。 No Milkshake No Life 地址：西環石塘咀山道31-37號地下A舖
