電影：飯戲攻心（2022） 我發現唔少影評都將最尾嗰句「打開門，行出去，去遠啲」放喺當今社會脈胳中，解讀成電影鼓勵大家移民，提醒大家「總之屋企人喺邊，家就喺邊」嘅概念。當然，喺作者已死嘅年代，大家鍾意點理解文本都係可以嘅。如果係咁，不如話二佬勾義嫂令大佬不滿嘅情節係中國、英國同香港的三角關係，叫大家忘掉過去，努力面前，接受現實。好啦，其實呢篇想返去探討最原始嘅命題—家的構成與影響。 【1】一切都係為你好：束縛起源「話曬一家人，都係為你好」作為長輩萬用金句，慣咗自由同理性思考嘅年輕人聽落總係覺得特別唔舒服。老實講，電影中嘅二佬同三佬就真係唔係特別想晚晚返屋企食，亦唔想同大家日見晚見，追尋自己理想生活更緊要。但大佬堅負住維繫家庭嘅重擔同遵從亡母遺願，用盡方法都唔可以比頭家散，而呢個諗法同情感亦成為咗佢生存動力同意義。佢覺得家嘅定義就係大家一團和氣住埋一齊，幫大家準備好一切就係完成任務，完全冇理過其他人感受。其他人一方面比面佢係大佬而聽佢講，另一方面內心好唔開心。而大佬自己又覺得好難受，點解自己做咁多嘢為大家好，但冇人領情。而佢呢個諗法係非常典型嘅威權家長式管理，最後唔單止令身邊人好大壓力，亦令自己陷入進退兩難嘅情景，冇一個人係真正開心。 【2】長枱與權力結構電影嘅重點唔係啲食物，而係喺餐桌上發生嘅事。成場戲嘅情節都係由餐桌向外擴散開去，如大佬開初喺食飯期間要求大家嘅女朋友搬入來住到、二佬求婚、最後晚餐等等。如果話聚首一堂食飯係提供咗一個溝通嘅渠道同機會比大家，咁同樣重要嘅就係長方形餐桌作為一個空間，展現咗一個完美嘅權力結構分層。例如大佬永遠坐喺頂端，望住兩則，呢個位置通常都係比一個群體之中地位最高嘅人坐，大佬借住長子身份同坐位，令講嘢都有份量啲。而坐喺兩則比較弱勢嘅二佬同三佬，雖然時而針鋒相對，但更多時係聯手夾擊坐中間嘅大佬，反映到大佬嗰種陷入兩難、冇人支持嘅處境。所以電影入面用長枱唔用圓枱，某程度都係反映緊喺特定空間嘅權力係點樣運作。 【3】喺餐桌上和解：放過自己有一個亞洲笑話係話無論你同屋企長輩點嗌交法，佢哋都係用「出來食飯啦」扮乜事都冇，食食下就會令你消咗啖氣。其實故事尾段嘅大佬都係用餐飯做到皆大歡喜嘅效果。講返「打開門，行出去，去遠啲」呢句，電影情節中當然係講賣單位，出去睇下個世界。而文本而外，除咗坊間認為嘅移民比喻外，我覺得係同大佬講係時候打開心扉，唔使再被家庭角色期望縛住，放過大家，比大家自決，自己都會煩少啲，人都舒服啲。真正嘅皆大歡喜係每人都可以做返自己想做嘅事，唔需要再幫人做決定，亦唔需要被人控制命運，隨心而行，無所束縛。家唔再需要一個實體空間同儀式建構，而係會喺大家嘅心中。 最後，呢齣電影仲有好多值得分析嘅角度，亦有好多意象同隱喻留比大家細心發掘。如果有時間可以再同大家分析下其他角度。
