新年點都要同屋企人飲下茶，但發覺唔係好多酒樓有開，有開嘅又唔係好想幫襯，唯有特登由大埔去到佐敦試試呢間新嘢。行點心放題嘅形式，對於我呢啲大胃王黎講，簡直係超級抵食喇！仲見到佢地嘅盆菜都好吸引下，有原條釀鯪魚，鄉下係客家嘅人就知呢味嘢好巧功夫。可惜宜家先發現已經太遲了，下年一定要試下。金沙熊貓包樣幾得意，其他酒樓都有類似卡通外形嘅包點，但個樣就奇奇怪怪，呢個起碼個熊貓樣正常，仲幾得意。內餡係正常流沙餡，小朋友好鐘意食，我都忍唔住食左一個，平時就好驚呢啲。 糖醋排骨有驚喜，肉質彈牙，味道酸酸甜甜，甜味會多啲啲。肥瘦啱啱好仲有肉汁，係我鐘意嘅程度，醬汁少少黏口，食左三碟哈哈。不過冇牙嘅老人家就不建議挑戰。 四季豆本身係諗住食吓菜，但冇諗到菜都咁好味，呢個四季豆係我地屋企top3受歡迎，推介推介！ 漁夫醬海蝦呢個都好少喺其他酒樓見到，味道幾特別，蝦肉鮮甜帶酒香，值得一試。不過外形冇咩特別所以都冇影相。佛山燻蹄第一次食點心有呢樣嘢，幾入味同埋好彈牙，屋企人鐘意食所以都order左兩碟，但就唔記得影相......紅燒乳鴿聽聞呢個係招牌，我見枱枱都有咁濟。所以order左一份試味。皮薄又脆，乳鴿肉質彈牙多汁，肉汁同燒出黎嘅油混合埋一齊好鬼香。 仲有其他食左唔記得影，對於第一次食神燈嘅我黎講有好多都好有驚喜。不過唯一不足就是平時飲茶會食嘅點心有啲呢到都冇，但又有好多係出邊冇或者少見嘅點心，所以都可以彌補佢嘅不足。總體黎講係食得開心嘅，又唔貴，仲好有新年氣氛。我諗我過左年之後都會繼續幫襯！
