小小朋友剛完成愛爾蘭工作假期，知道很多準參加者各種問題，而網上資料好似唔多，希望能用個人經驗減少你們的擔心。 1.如何申請？ A. 每年三月一日接受申請，先sd email到愛爾蘭大使館約時間。帶齊所有文件一式兩份，學歷，所有申請過嘅passport正副本，保單正副本等(請參考愛爾蘭大使館資訊)，跟據佢網上嘅順序排好。值得一提，填好申請表之後要影印一份。同埋passport最後一頁緊急聯絡人亦請影印兩張。 tips 1 請唔好偷懶，文件一定要執齊影印好兩份，有多佢會幫你執返出黎，但係唔夠就需要你去搵影印鋪自己再影印。遇著大使館人員唔得閑等你，可能要再約時間白行一趟。 tips 2 曾經住院嘅朋友請要求醫生開一張証明適合去旅行(或者先打去問有冇遞交証明嘅需要) (我申請嗰陣同時有兩個人一齊遞表，有一個因為冇証明而打回頭)。 tips 3 佢可能會問你一啲問題例如點解passport咁新，我話因為我去台灣網上簽證出境嗰陣被收返所以好新淨。答得上口就okay。 利申：以上只係個人經驗，有啲影印咗唔代表一定有用，因為朋友申請嗰陣都唔需要緊急聯絡人個page。 2. 工作好找嗎？ A. 除非你的英語超級流利，個人認為鬼頭工唔易搵。加上東歐國家加入歐盟之後，搶飯碗嘅人多的是。但華人工需求幾大，facebook上嘅群組專頁間唔中會有人post一啲工作機會出黎。華人工可以去0086.ie度搵 3. 到咗先搵工定搵咗工先去？ A. 我當時係到咗先搵工，將資料post上0086，第二日就有電話回覆。加加埋埋我總共收到七八個電話問我係唔係搵工。 4. 工資幾多？ A. 冇經驗樓面約300歐一個星期，鄉下中餐廳多數包食住，感覺上比鬼頭工更易儲錢(唔駛交租吖嗎)。支出就只有早餐日用品，同shopping哈～有啲老闆會收電網費，有啲包埋。順帶一提，愛爾蘭喺上年十一月實施水費，所以租屋可能要將呢樣嘢加落支出度啦～ 5. 英文程度？ A. 我英文會考lv2，讀寫還可以，聽同講真係有困難。啱啱黎到，聽唔明係正常，但大部分香港人由細就學英文，點都有一定基礎，肯講其實你會發現自己英文都唔係差到咁。我自己幾個月以黎都喺鄉下生活，客人九成九都係外國人，老闆成日都叫我多啲同客人傾計，佢地人好好，唔會介意你英文差聽唔明，亦會好耐心聽你講嘢，你可以禮貌地要求佢地講慢啲或者repeat，大部份都好樂意，係好好嘅訓練機會。學英文之餘仲可以同客人打好關係。 6.物價 A. 每個星期超級市場都有唔同嘅特價貨，剩係買嗰啲食好平。約0.39歐一袋蘋果或其他蔬果，1.5歐 2L鮮奶，0.7歐大袋面包。日用品方面，超市自己嘅牌子都好平，沐浴露同洗頭水唔駛一蚊一大支，不過就一分錢一分貨喇...其他牌子就貴啲啦～3至5歐一支，但咁啱遇上特價其實都有機會平過香港。女仔M巾1蚊包約十塊，可以唔帶或只帶一次用量除非你敏感啦～我嗰陣就係怕啲嘢貴，帶定好多，搬屋嗰陣煩死啦，好後悔。尤其係衫，去到嗰邊penneys買啦，而且當你真係搵到工就會發現跟本冇機會著自己衫 (我返工日日黑衫黑褲)。需要的藥，Masks，洗臉護膚品可以帶多啲，唔平而且唔係個個適用。日用品好似洗頭水沖涼帶兩個星期量就okay，始終買大支帶住唔方便。
