上星期剛剛去完泰國,本來一切順利,每日食玩訓,幾咁梳扶! 玩到第三晚,去Patpong夜市行街街,食個泰國晚餐十二點幾才斯斯然返酒店,點知返到房想搵返個腰包仔時候,搵來搵去都冇,才頓然醒覺唔見左!!最緊要腰包仔裏面有passport,估唔到咁不幸的事情竟然發生在自己身上,不過埋怨不如立即去報警,於是就在這凌晨就展開一日一夜報失之旅! 首先去酒店大堂搵職員求助,依位大堂職員十分helpful,佢案發時間、地點、經過、失物特徵,一一仔細查問並筆錄,非常詳細,我懷疑佢係泰國無間道,係酒店扮職員。佢查案一番之後,再教我地去報案及明天去領事館補領臨時證件。 到警局時,時間已經係凌晨一點,經過半個鐘等候加上同警員一輪雞同鴨講的對話,終於完成報案,並取得報案紙。準備離開警局時,跟門口另一位懂英文的報案男士聊天,佢知道我在Patpong遺失證件,見佢冷笑一下,彷彿表達果度係龍蛇混亂之地,唔見財物係司空見慣。 報警後返酒店,再搵大堂職員傾下要再點處理明天的事,點知佢為我帶來惡耗,因為明天是星期六,中國大使館係唔辦公,而且剛剛一路幫我打大使館24小時報失熱線,結果係打唔通!心情突然一沉,本以為報完警加上明天去大使館辦完證就一了百了,星期日晚順利返港。但如果明天不能辦證,後天是星期日,一等就要等到星期一先可以補領證件,但我星期日晚的機票不能改期,大獲! 於是成晚都訓唔著,不過都成四點,點都要訓下…果晚發夢仲有個黑幫人仕話可以俾錢佢幫我搵返本passport… 就係星期六的早上,食完酒店早餐就一早出去大使館摸上門搏一搏… 中國駐泰國大使館位於MRT的Phra Ram 9站同Thailand Cultural Centre中間,在Thailand Cultural Centre站往南行十分鐘就到。 到達中國大使館,保安教我辦證要去前一個街口的辦證大樓,心諗佢教我去大樓,即係今日有開啦;正當心中暗喜時,眼前的辦證大樓掛住左個牌”CLOSED”!! 裏面的保安耍手擰頭話今日冇辦公,不過經過一番糾纏之後,保安終於屈報俾我入去。入到大樓是但找左個中國男子查問,佢話今日的確係休息,冇人做野,不過依個好人幫我打電話搵有關人仕。半個鐘後,終於找到位女仕幫我,原來依位女仕咁啱今日係度開OT,如果唔係佢一早走左,佢了解左我情況後,話可以幫我今日辦臨時旅行證件,用黎俾我出境,今次真係謝天謝地。 由凌晨12點半到下午3點,付出足足大半日,一晚既睡眠,加上2100泰銖補領費用,同埋無限既緊張,終於取回一個出境既機會。下次去旅行真係要小心財物!