如果有追開我blog的都知道，港女我上次旅行已經半年前，去咗越南受苦了5日4夜 宜家諗起都眼淚心裏流，所以今次決定同Boyfriend自由行，自己plan行程，so flexible！ 想去2日京都，3日大阪的朋友可以參考以下的行程表 今次我地選擇住景點附近的民宿（京都住清水寺附近，大阪住黑門市場樓上，一落樓下有得食有得買，平均每晚每人300蚊港幣左右），勝在夠方便，日本交通費貴，路線又錯綜複雜，行路去景點慳錢又快捷，可以上www.booking.com度book，建議揀可以免費取消及可以寄存行李的，不過呢D民宿會好快被人Book曬，特別近賞楓賞櫻季節，會特別貴，所以要提早2個月以上book定啦！ 到達京都站一定要去10樓的拉麵小路！呢度有齊9個地方出名好味道的拉麵，想食咩口味都任君選擇。今次我地就食做富山拉麵同東大拉麵，比較之後，覺得富山拉麵好味好多，湯底和溏心蛋都十分好味！ 早上10：30嚟到京都清水寺，已人山人海，楓葉未紅，已有大批旅客佔據各賞楓熱點，影親相都有人攝鏡，下次真喺要再早D嚟，避開人潮。BTW要買門票入去的（320 yen每人）。 嚟到大阪點可以唔去道頓崛和心齋橋？呢度喺日本的美食天堂，各種的藥妝美食靚衫靚鞋應有盡有，正過旺角銅鑼灣多多聲。 日本D巨型招牌雖然好浮誇，但真喺好有特色，過目不忘，反觀香港，招牌密密麻麻但千篇一律 順便提提你，大阪物價比起京都平好多，建議到大阪先瘋狂掃貨 推薦大國藥妝店，貨物應有盡有，分店又夠多，買夠5000 yen出示護照可以有8%免稅，仲可以折上折，再追加2%off，不過需要優惠單張，喺某些分店有職員派俾遊客，記住攞呀，每張leaflet只可以用一次，俾錢時職員會收翻或者劃花bar code的。 攝於道頓崛某酒店門口，巨型人頭腳石像，好正！記得影相呃like！ 嚟到法善寺，附近有間古老的店，好巴閉ga，只賣紅豆湯，for 情侶2人的set 餐喺800 Yen，貴得嚟又好甜，但勝在背後個故事夠煽情，不妨一試。 食完紅豆湯，可以去埋附近的上方浮世繪館，6點關門，要買門票入去，每人500 yen 除咗可以欣賞日本D畫作之外，還可以體驗刷版，樓上仲可以體驗下喺提供的2款畫作上塗上顏色，可以令呢個旅行除咗食買之外，都可以多D嘢玩下，塗完顏色可以影相及帶走留念。 下年會再嚟！
