韓國零食有咩推介？之後飛到韓國又買咩零食做手信好？即刻睇吓依篇開箱文啦！最近見香港市面都多咗賣韓國零食，忍唔住入咗一大堆，當中烏龜餅、朱古力麻糬曲奇、Sun波浪粟米片已經回購超過5次或以上，真心推薦俾大家～ 烏龜餅 꼬북칩 一打開就聞到濃濃嘅粟米濃湯味，每粒由3至4層薄脆片組成，食落超酥脆，試完特別喜歡依種口感，早前行DONKI有發現日本有出類似嘅脆片零食都即刻買嚟試～不過今篇集中講韓國零食所以不作詳細介紹，請見諒！其實依款烏龜餅仲有玉桂味、蝦味、黃豆粉麻糬味、麻辣味，最近韓國新推朱古力churros 味，之後去韓國旅行不妨買嚟試，暫時香港市面買到粟米及玉桂味，如果有人見到我喜歡嘅蝦味請通知我～ 回購度 ：♥️♥️♥️♥️♥️ （5個♥️為最想回購或已多次回購，1個♥️為無太大意慾再入手）烤蝦米餅 구운 새우칩 我真係好鍾意蝦味零食😂所以超愛依款！事實上買嘅時候店員話係櫻花蝦味，但睇圖同韓文都唔似，食落都唔覺得係櫻花蝦，好彩個人鍾意蝦餅，所以都滿意！同平時見到嘅日本大大塊蝦餅或四洲蝦餅嘅口感唔一樣，依款較重香烤味，米成份佔40%，所以米餅清淡而帶烤蝦嘅鹹香味！ 回購度 ：♥️♥️♥️♥️牛油蒜蓉味脆波 맛볼!?口感似細個鍾意食嘅時興隆魷魚波，只係換咗做牛油蒜蓉味，我個人對蒜蓉包都一般般，所以只是個人口味唔同，都係好味，一開唔使15分鐘都會食晒，可以再回購但相比上面2款個人回購慾低少少。 回購度：♥️♥️♥️Sun波浪粟米片（辣味）話說係韓國人朋友親自推介，我一試就愛上，無論大包定細包每次都極速清空，回購度接近20次。味道算BB辣，自己就覺得似甜辣，幾開胃，薄脆粟米片唔油膩，每塊粟米片上都見到有少少穀物，食落無咁罪惡感，好容易失去理性係咁食XD 新出的蒜蓉包味試過個人就麻麻地，唔推介！ 回購度： ♥️♥️♥️♥️♥️ 雞粒pop 치킨팝 見到韓國網紅都食，貪得意買嚟試，細細粒但好足料，幾乎滿晒。平時鍾意焦糖味爆谷，突然轉食炸雞甜辣味，感覺怪怪的，可能韓國人會較為習慣，所以一包會食得晒但再購意慾係全部零食中最低。只影包裝作大家參考。 回購度：♥️朱古力麻糬曲奇/原味麻糬曲奇 2019年年底韓國新推的零食，好快就成為大家旅行必買手信之一。近來香港便利店都買到細盒5個裝，港幣太約有十幾蚊～兩款都好味，麻糬控就一定鍾意，口感好煙韌，原味較傳統，餅身亦較朱古力黏口，未必個個鍾意，偏好古早味嘅朋友可以試試～而朱古力麻糬依個組合就無得輸，人氣度極高，更吸引有Blogger 發布「神還原」朱古力麻糬曲奇食譜，大家不妨上網搵搵就見到！ 回購度： ♥️♥️♥️♥️士多啤梨乾見好多網購南大門老爺爺乾果、魚乾，價錢都相宜買咗試，貪佢聲稱無添加色素同無加糖，好似好健康，同埋平時水果乾都唔算平，佢真係抵買嘅，但幾大包，一大班同事分就唔錯，一個人好難好快食完，最好放雪櫃保存同放密實袋～味道方面係偏酸嘅，放得越耐會變硬身同更酸（同無防腐劑應該關事！？），怕酸朋友就唔好試，兩位男仔朋友更加試完一粒就say no ，可能男仔唔鍾意酸🤣 回購度：️ ♥️ ♥️ ♥️鐵板燒原味魚乾 스틱어포平時都鍾意食魷魚絲、魚乾，雞泡魚乾等，如果你同我一樣，下之去韓國可以入手魚乾等零食，韓國人鍾意飲酒配啲下酒菜，普通便利店都搵到類似魚乾、魷魚乾，買大包裝可以去南大門！最近行小型韓式超市第一次入手，夠𡁻口，一次過食幾條會厭佢有啲甜，後來為咗寫文分享，研究下佢係咩魚嘅時候，唔係好查到係咩魚，睇圖又覺得條魚外表唔太討好，減低咗回購意慾！下次都係買雞泡魚乾算～ 回購度：♥️ 全部自費。各人口味不同，味道或食評只供參考。香港邊度有得買就唔特別提，好多網店、韓式超市、759、便利店都有，大家真係搵唔到先再留言問啦～
