香港的水塘大大話話都行過唔少，每個其實我都覺得差唔多樣。 但今次呢一個真係令我有嘩一聲嘅感覺，就好似一幅畫。 藍地水塘相信都唔係話真係好多人去過， 我選擇左呢一條由屯門出發嘅路線開始， 由屯門西鐵站 A出口杯渡路，一出轉左直行過對面馬路 一路直行到杯渡站，穿過輕鐵站，過前面對面馬路 就會見到何福堂夜校，旁邊有好明確指示牌-麥理浩徑10段 一路沿斜路上，有數個分岔口，只要跟地上郊野公園方向行 開始上山啦， 樓梯都咪話講笑，都幾多。 特別係呢一個天氣，汗流浹背 好快就上到去地圖分岔口啦，右邊係去大欖郊野公園 左邊就係去屯門徑嘅，一路走就冇乜分岔口，途中會有涼亭休息 再繼續上山， 望番落去屯門景致， 一路走仲見到好多彩色嘅欄杆，穿過彩色欄杆繼續上山 好快就到左呢個旅程嘅最高點啦，有個休憩的涼亭。 選擇涼亭側邊嘅山路繼續向前行，沿途沒有遮擋 但係好快開始下山唔算辛苦，道路亦經過細心鋪排，不是碎石路 下完樓梯第一個分叉轉左，就會見到呢個牌 之後好快就去到虎地燒烤場，穿過燒烤場右邊往水塘 去到盡頭右手邊有樓梯落去，到達目的地啦！ 好靚嘅藍地灌溉水塘，有種置身於外國嘅感覺 點擊圖片放大 +4 呢個水塘啲水好近，唔同平時係個高高既水壩望落去水塘 好似同啲水好近嘅感覺， 相信藍天會更靚 可以行到盡頭去藍地村搭車走 但我地選擇返虎地郊野公園沿車路落去大路 看似辛苦嘅路線其實大約兩個鐘已經完成 絕對推介大家來呢一個藍地灌溉水塘，反正春天大霧行水塘最好。 (唔想行山，直接來水塘亦可以直接前往虎地燒烤場) (相片始終唔夠真實靚)（不是用比較專業相機） 交通：屯門西鐵站A出口，轉左直行到尾何福堂書院旁 難度： ** (只是上山樓梯都多) 景觀: *** Facebook : mollystravelbook Instagram : moneymollyxx
