睇電視劇公公出宮，今日就帶大家去拍攝場景開平睇下有咩好小食手信！首先我途中會經過金家大宅，因為私人地方旅遊車未能停係附近，只好經過碉樓。走進赤坎古鎮，美食就係眼前！ 第一站：煎炸小食 到市集中嘅街道，路邊就有煎炸小食，＄10就有一盒，可以配搭魚肉豆腐、多春魚、粟米餅、韭菜餃子等，加大量香蔥就更清香。 第二站：芝麻麥芽脆片 咁岩遇到老闆娘係我哋面前親自示範，用麥芽糖加入炒香嘅黑白芝麻，放落有椰絲嘅木盤中，趁熱不停用好似熨斗嘅工具，將佢哋弄開，等佢攤凍後，麥芽糖就會令到佢哋脆身，仲帶點熱力特別好食！ 第三站：薑汁撞奶 去到農村地方，就試吓佢哋出產嘅食材，呢度嘅薑味好辣，一直落到喉嚨，傳統嘅會用水牛奶，奶膩更香濃！ 第四站：雪條 老係大陸受歡迎嘅冰條，係冬天時去北京無得賣，呢度只售$2，有啲似汽水味甜味唔做作！ 第五站：煎餅 有豆沙、蝦米香蔥味，由老闆娘即買即做，下面用炭火加熱，一邊新鮮熱辣製造，步驟快速就做出美味煎餅。 點擊圖片放大 第六站：雞 兩日一夜嘅旅程，總共食咗六次雞，雞肉彈牙，走地雞絕對冇皮下脂肪，雞皮爽口，雞嘅size比較細，有不同嘅做法，特別係宵夜時候食嘅鹽焗雞，用錫紙保留肉汁，兩個人分一隻都唔係好夠食！ 第七站：糖果類 另一用薑造嘅小食，有好似叮叮糖咁嘅，辣味十足，或麥芽軟糖，上下兩面用白芝麻包住夾心，帶有兩種香味，都好適合做手信。 第八站：米 去到農村地方，屋人都好鍾意買米，呢啲米好細粒，叫老鼠牙或象牙米，都屬於絲苗米，煮嘅時候唔可以放咁多水，水啱啱蓋過米就好，非常彈牙，我哋就買咗廿斤米，所以建議大家帶個行李喼 哈哈！ 多謝支持! 有更多相片分享可以到我嘅專頁 Mohkc’s :) Openrice/ UBlog/ Instagram / Facebook page: mohkc 頭上插著筷子, 到處吃 mohkc.com
