原來就算人唔變,環境轉變會迫著習慣改變。香港生活太過方便,肚餓落街大把嘢食任你揀,又平又快又好食;就算懶係屋企,煮個麵都懶,啪個杯麵又一餐。周末最叻留在家攤屍,怪唔得我咁鍾意蛋黃哥 (冷笑) 老實講,英國人飲食完全唔叫健康,太多薯仔薯條、甜品甜到食一啖好似會即使有糖尿病咁。不過,英人習慣喺屋企煮,出街食飯最多一星期一次,甚至兩星期一次。反而超市買食材又新鮮又平,迫著淨係識煮公仔麵的我,都要學起煮食來。其實都唔叫「煮」,好多嘢食都係放入焗爐,例如魚、磨菇等,油都唔駛落,15分鐘新鮮食得。生果更係超平又新鮮,一大盒藍莓、車厘子唔駛港紙20蚊,香蕉、奇異果10蚊有找,買一大袋切切切放入雪櫃口痕食食食,食到飽都無咁內疚。 食得健康咗,就不如做埋做運動啦。 香港人多車多,落街跑個步避人群好似跑迷宮咁。係英國,尤其近郊位,人影都唔多隻,著到勁樣衰落街跑,一路跑一路大聲唱歌都無人理你,司機見到你反而會向你微笑,友善的環境令我養成了每日做運動的習慣,即使每天在家工作如是。以前一星期做2日都已經係奇蹟地勤力,而家一日唔做反而唔自在。 以上文字並非話英國有幾好,老實講我好掛著香港,亦非常懷念以往香港工作拼殺OT到凌晨12點,食幾粒魚蛋夾餅就飽的生活。不過Life goes on,我不會永遠25歲,宜家有個機會畀我改善生活,咁就Just go with it 啦。可能某日我會過返蛋黃哥的Hea生活,不過至少媽媽今天不用擔心我。 ======================= 怎麽一覺睡醒就在英國了 miss winter in to UK 90後前旅遊網站編輯,港豬一枚跟着愛情跑到英國。 唯一牽掛的是一串串街邊細粒彈牙的咖哩魚蛋。 想到魚蛋,我又餓了。 腦袋就充滿這樣的無厘頭東西。 >>Facebook: https://www.facebook.com/misswinterinuk/