我在面書上開始寫有關泰國的資訊都差不多六個月！就籍今次同大家分享我以市集為主題的作品！亦當是幫自己的作品來一個修訂補充吧！ 另外斜體字是面書的文章，而底線就是新補充，所以分別吧。 【Chatuchak Weekend Market】 一個你可能永遠都行唔晒嘅市集！……仲要真係咩都有得賣喎！ 第一次我行左唔夠四個鐘，其實都只係冰山一角；第二次，六個鐘……都只係行多二個section……；第三次，行左兩日……超過八個鐘，做左迷途嘅小綿羊…… 如果大家去泰國係想行市集呀、夜市咁呢……我就唔建議你地嚟呢度囉……因為行完呢個市集，根本上你喺其他啲市集、夜市都係見到同一樣嘢…… 另外，嚟翟道翟緊記一句說話「沒有最平，只有更平」……我認真嫁！ 補充下先，其實星期六佢係有夜市嘅！ 【雷聲•雨點】 雷聲大，雨點少係用嚟講喺十二月一日開幕嘅水門TALAD Neon呢個新市集! 開幕時個個網站都話必到新夜市，我就喺十二月四日到此一遊!真係一遊囉！好辛苦咁行左十五分鐘……檔位少，買嘅嘢無特別……可能我仲掛住一個已經無左嘅超正夜市@SliomNightBazaar啦！ 另外@TALAD Neon 宣佈左係一七年一月開始，由依家嘅四日加多一日為五日。即係逄星期三至星期日，四點到十二點!希望會有幫助啦！ 自己認為其實幫助真係不大囉！首先地點唔好，喺水門行入去五分鐘十分鐘左右其實問題唔大;最大問題係行入去呢度之前，你一定要經過Platinum Fashion Mall!而其實夜晚呢個Mall門口會變成一個巿集!大家買嘅嘢都係差唔多，點解要行多十分八分鐘入去睇同樣嘅野啫… 不過我作為一個泰旅網“頁”主，有新野緊係要去睇睇啦！ 禮貌都要講句:支持下小本生意!入去睇睇，可能有新發現啦！話晒我係四号去，到依家都有成半個月囉！其實佢都有打卡呃like嘅地方嘅! 因為這篇文是在十二月下旬寫的，而且其他同業對他的介紹都比較小！現況好像開始好轉一點，有些自家設計的新產品和按摩的小鋪開始經營。 【Arts Box Bangkok】 曼谷Arts Box係以一種pop up嘅方式去俾啲年青人咁發揮自己嘅產作力，比佢地去賣佢地嘅創意嘅一個新型市集！其實咁嘅方式我自己覺得係一種好正面、好值得推廣嘅！咁呢啲野我MissThai靚當然大力讚好啦！ 其實呢個organizer好簡單咁用啲貨櫃咁喺個空地比啲年青人自己賣自己嘅創作，有衫呀、精品呀、小擺設咁！當然，呢度同JatuJak Market當然好唔同啦！至少呢度啲鋪與鋪無咁密先囉！ 而今次好似係第3次擺，今次佢地嘅選址就係JJ Mall嘅後面！佢地會擺到出年(2017)嘅4月30號！ 【碼頭夜市】 近年曼谷最受歡迎的夜市，毫無疑問大家一定首推呢個Asiatque The Riverfront啦！ 咁又係嘅，海邊兼且有靚靚嘅河景！仲有摩天輪，望落去好似幾好食嘅餐廳等等囉！ 其實好多人都有介紹過呢度，我唔再多講呢啲千篇一律嘅嘢！ 咁不如我就簡單咁講下呢度嘅前身：呢度前身係一個港口，到1947年就停左同變左個廢墟！鬼叫人地泰國地大物博咩，荒廢左幾廿年都無人理……咁直到2011年便由泰國嘅地產商改建成夜市，並取代之前無左嘅Suan Lum Night Bazaar…所以裡面係用返之前嘅港口碼頭、貨倉咁做設計，另外仲有啲碼頭咕喱銅像做下擺設咁啦！ 其實呢個夜市嘅評價好壞參半……好似我呢種老泰遊就唔多好啦！ 又來一些資料補充，其實這個夜市除購物和餐廳外，她亦有泰拳等表演提供給大家參觀欣賞夜市。 【日本?曼谷?】 九龍城有稱小泰國，金巴利道又叫韓國街；其實係曼谷都有好幾處地方有日本街之稱！ 話說上次我同老公去完SamYan拜神捐棺，咁係去嘅中途我地發現左呢度好鬼死多日本餐呀、拉麵呀咁！係SamYan行番轉頭，大約行左十五二十分鐘左右啦！ 原來呢度就係叫Patpong！夜晚時份仲有個好似幾出名嘅NightMarket! 溫馨提示下啲姊妹團先，呢度夜晚黑會變成曼谷另類著名嘅紅燈區囉！要好好睇緊自己個衰佬呀！ 其實應該有好多朋友都知嘅，其實最近嘅BTS站咪就係SalaDaeng囉！ MissThai靚提提你，如果係泰國食悶左泰菜，其實日本餐都係一個唔錯選擇! 話晒日本都算係第一班人去泰國發展嘅國家! 資料補充 西元1968年，就開始有夜總會，用以係接待越南戰爭的美軍官兵，就好似香港的謝菲道一樣。另外Patpong Night Market 和廟街女人街差不多，主要賣盜版光碟、仿冒名牌包等。 【JJ Green】 JJ Green夜市只係開星期五、六兩日，不過我強烈推薦呀！ 呢個夜市比較有啲特色，有部分係中古貨、另外當然有啲得意嘅Tee、同首飾品咁啦！但同Chatuchak係有分別嘅！ 我建議大家可以喺星期六一整日留喺Chatuchak Weekend Market度行！行到Chatuchak Weekend Market開埋夜市，再過JJ Green行！再係裡面嗰個餐廳食飽飽，再行多陣，趕尾班BTS返酒店！ 樓上雅座！與市集的熱鬧形成一幅相映成趣的圖片 【草根市集】 其實曼谷真係好Q多市集！ 就好似喺半島酒店附近就有個市集叫Klongsan Plaza（礦省）! 呢個Klongsan Plaza係連接個渡河碼頭，但唔係去Asiatque嗰個喎！大家千祈唔好去錯呀！ 當然，市集又點會少得有地道食品攤檔呢！而且佢地一早已經有攤檔開檔賣早餐啦！ 補充一下先，唔好諗住呢度會好多嘢睇好多睇買！因為呢度真係一個好地道好草根嘅市集！ MissThai靚，地道市集在礦省 【Khao San Road】 一個燈紅酒綠嘅地方，滿佈廉價式賓館的地區……中文叫考山路“Khao San Road”！ 我去親都係搭的士，喺Central World、Siam嗰邊搭去大約七八十B，一定唔會過百！咁大家要去嘅話就大概知價啦！ 一街都係酒吧、按摩、西餐廳、紋身……另外仲有啲souvenir咁啦！ 特色?!就咁坐喺絛街比人按摩算唔算呢？ 呢度比較啱啲想體驗下鬼佬feel嘅朋友！ 呀！唔記得講添，呢度有蠍子呀、蟲蟻呀咁嘅嘢食……我就食過蠍子……其實無咩特別，好似食蚧仔咁囉！ MissThai靚，一街鬼佬在Khao San 一位傻瓜...正在品嚐一隻蠍子! “他”向路人兜售他公司的服務！是紋身啊！ 當然除了已上我提及過的幾個地區外，還有Sam Peng、Pak Klong Talat鮮花市場、Bo Bae Market、Saphan Phut夜市等夜市市集…… 待我下次泰遊後，再為大家拍照介紹吧！ 另外在我的面書專頁，有很多不同的泰資訊！大家有興趣不妨看看，留我意見吧！ https://www.facebook.com/MissThaiBeautyHK/?fref=ts
