前文提要，Miss Mean 同老公成功第一日係門市取機，但我哋嘅斬獲卻是天淵之別⋯⋯老公買了一部iPhone 15 Pro Max 藍色鈦金屬 （512GB)，原本佢諗住攞嚟自用。點知佢lunch 取機後，見到個炒價非常好，佢都忍唔住割愛賺錢。由於佢要趕住開工，所以賣機任務自然落係我身上。老公都挺大膽，他叫我將部手機直接賣俾IFC 門口的中東買家。（作為新手，Miss Mean 都有擔憂，我又怕被人搶電話、又怕收到假銀紙。不過，既然老公都唔怕，我當然無又怕。）我戰戰兢兢與中東買家交涉，討價還價免不了。雙方講好價錢後，佢就數銀錢，我就繼續牢牢地抓緊我部手機，總之我堅持「一手交錢，一手交貨」！收到現金後，我即時數了兩遍，確保銀碼正確，我才火速離開現場，然後即刻搵部櫃員機入錢！當我成功入錢後，我才真正鬆了一口氣，可以同老公交差。一買一賣，老公賺了$2301，我好羨慕啊！（我替老公跑腿，他賺了這麼多，卻不肯分一點給我，真小氣。）我等了一整天，好不容易到晚上七點，終於到我可以去希慎廣場的Apple Store 取機！放工時間，Apple Store 人山人海，取機的客人太多，大排長龍，令我嘆為觀止。幸好Apple Store 員工人數眾多，我排了大概半小時就成功取機。可惜，到了晚上，手機的回收價已經回落，老公叫我唔使急住放機，所以我就拎咗部iPhone 15 Pro Max 藍色鈦金屬 （256GB) 返屋企。接下來的兩天（星期六、日），手機的回收價一落千丈，我越看就越灰，心理很不平衡。明明同一日取機，老公可以賺成2千幾蚊，我的手機只可以賺6百蚊！唉，我認命，趁仲有少少水位，我星期一拿拿臨到旺角先達放機。（同人唔同命，呢句說話一點都沒錯。）放機當天，先達廣場人流不算多。我當然周圍逛逛、到處格價。先達廣場內有很多店舖都收機，它們清清楚楚將價錢標示出來，令賣家一目了然。其中一家店舖的出價稍為高一點，所以它的店前有不少人排隊放機。我當然唔執輸，立即去排隊。今次放機，我沒有上次那麼緊張。一來，先達的手機回收價透明度很高，我可以周圍慢慢睇，慢慢㨂；二來，店舖備有點鈔機，我可以唔使當街當行數銀錢。交易完畢，我當然第一時間搵存鈔機。總括黎講，炒賣iPhone 都幾刺激，每日回收價大起大落，心血少啲都唔得。不過，作為無業人士，Miss Mean 唔敢落重注，畢竟炒賣始終有風險，所以我都諗定後著。萬一我部電話炒燶，我就即刻拆盒自用！
