上星期三，Miss Mean 興致勃勃去會展開工，今期返「香港珠寶首飾展覽會」，而我的崗位係某參展商既翻譯員。（個名就好好聽，其實咪都係Sales 一名！）我唔係第一次返呢一類型工作，但今次我真係頂唔順。第一日開工我已經好後悔，而第二日我係死頂，臨收工我直接叫負責人換走我！究竟發生咩事？話說今次個參展商黎自日本，個booth 都幾大，除咗佢哋公司職員外，佢另外都請咗三個part-timers 幫手，可想而知生意幾好。人事上其實無咩嘢，大家都好nice，有傾有講，相處融洽。唯獨有一樣，我真係接受唔到，就係要企足六個鐘，除咗食飯果半個鐘，其餘時間係唔俾坐！（當我知道係日本參展商，我都心感不妙，估唔到女人直覺咁準⋯⋯）第一日返工，眼見個個都齋企，Miss Mean當然跟大隊，乖乖企足成日，好不容易捱到放工⋯⋯一放工，我唔係去搭地鐵，而係要即刻搵位坐！會展又無座位，我唯有行多幾步，去隔離既酒店大堂搵張沙發坐下。休息了大概十五分鐘，我終於有力氣可以返屋企。瞓咗一晚，我以為對腳會回復正常。點知我的左腳仍然好痛，尤其係左膝附近位置（始終有舊患），我唯有出動護膝包著它，我才能夠走出門口。老公見到我咁辛苦，佢都忍唔住出聲，叫我唔好再返工，但係Miss Mean 始終有責任心，唔會臨開工先劈炮唔撈，所以我都係忍痛返工。第二日開工前，我同負責人傾過閑計，我順便同佢講左我既舊患，打定個底。佢只係話：「仲有幾日，你點算？」我開始試佢既底線，只要無客，我就搵位坐，歇一歇對腳。果然，一試便知龍與鳳，負責人下午就搵我照肺，明言返工一定要企。無計，你都開到聲，我唯有捱到收工，然後辭職⋯⋯ 無客既時候要員工罰企＝服務好？我真係唔認同囉！我只係知咩叫職安健，長時間站立會危害健康，僱主有責任為員工安排適當休息時間。關於呢方面既詳情，大家可以瀏覽勞工處或職安局既網站。換著以前的我，我一定會乖乖罰企，直至工作完滿結束。依家，no way！我只係知道，唔體貼、唔人道既公司，Miss Mean 絕對唔會留戀！道不同，不相為謀，早走早著，勉強無幸福！未搵到好路數之前，Miss Mean 繼續放下假～～～
